Rêxistina Poder Popular a Arjantînê bi daxuyaniyekê piştgirî da berxwedana Rojava ya li dijî êrişên çeteyên HTŞ û DAÎŞ’ê ku piştgiriyê ji dewleta Tirk werdigirin.
Di destpêka daxuyaniyê de hate gotin, “Em weke rêxistina Poder Popular a li Arjantînê, li hemberî bûyerên giran ên ku li Bakur û Rojhilatê Sûriyeyê û li axa Rojava diqewimin, xemgîniya xwe ya kûr û piştgiriya xwe ya dilsoz nîşan didin. Li gel ku peymana agirbest û ‘entegrasyonê’ jî hatibû ragihandin, êrişan dewam kirin. Wekî ku Hêzên Sûriyeya Demokratîk (QSD) ragihandine, li Ayn Îsa, El-Şedadê û Reqayê û heta li derdora zindana El-Aqtan a ku endamên DAIŞ’ê tê de têne girtin, şerê çekdarî qewimîne. Ev rewş ji bo hemû herêmê rewşeke pir xeternak diafirîne.”
Daxuyaniyê bi vî rengî dewam kir:
“Fermandarê Giştî yê QSD’ê Mazlum Ebdî bi awayekî zelal gotiye: Ev şer ne şerê me ye ku me hilbijartiye, lê tê ferzkirin. Li hemberî hewldanên bi mebest ên ku dixwazin ezmûna siyasî ya bi salan hatiye avakirin hilweşînin û herêmê bixin nav şerê navxweyî, hêz û gelê Rojava ji bo ku xwînê zêdetir neherike, biryarên taktîkî girtine, lê ji rêgêzên bingehîn venegeriyane: Parastina destketiyên şoreşê, karakterê wê yê demokratîk û pirneteweyî û pêşengiya jinê.
Em dorpêça bêdengiyê ya ku medya mezin a herêmî ferz dike, şermezar dikin. Ev medyayê zêdebûna leşkerî vedişêre, binpêkirinên agirbestê kêm dihesibîne û ne tenê ji bo gelê Kurd, ji bo hemû civakên ku li Sûriyê dijîn û ji bo aramiya herêmê xetereyên ku têne afirandin vedişêre.
Berxwedana Rojava ne mijareke herêmî ye. Ev dozeke navneteweyî ye. Yek ji wan ezmûnên herî pêşketî yên xwe rêvebirinê, jiyana hevbeş a gelan û rizgariya jinê di dema me de di xetereyê de ye.
Em ji Arjantînê bang dikin: Bêdengiyê bişkînin, bûyerên ku diqewimin belav bikin û piştgiriya çalak a bi gelê Rojava re xurt bikin.
Parastina Rojava parastina jiyanê ye.
Berxwedan jiyan e.
Jin, Jiyan, Azadî.”
