Piştî dagirkeriya Tirkiyeyê ya li ser Efrînê di sala 2018’an de bi hezaran şêniyên Efrînê neçar mabûn ku koçber bibin û li herêmên Rêveberiya Xweser bi cih bibin. Yek ji xalên sereke yên peymana ku di 29’ê Çile de di navbera QSD’ê û Hikûmeta Demkî ya Sûriyeyê de hat îmzekirin, vegera xelkê Efrîn, Serêkaniyê û Girê Spî bû.
Di vê çarçoveyê de vê sibehê zêdetirî 623 malbatên Efrînî yên li Kobanê bi cih bibûn, piştî 9 salan dest bi vegerê kirin. Şêniyên Efrînê, piştî salên dirêj a koçberiyê daxwaza xwe ya jiyana li bajarê xwe anîn ziman û daxwaza Sûriyeyeke demokratîk û aştiyeke mayînde kirin.
‘EM 9 SAL IN LI BENDA VÊ ROJÊ NE’
Yek ji şêniyê Efrînê Hemîde Omer Mihemed, diyar kir ku vegera wan ji bo wan destpêkek nû ye û got, “Em 9 sal in li benda vê rojê ne. Em li ser rêyên koçberiyê ji Şehba ber bi Kobanê ve hatin. Koçberî pir zehmet bû. Niha tenê daxwaza me ew e ku em li axa xwe bi rengekî aştî bijîn.”
Hemîde Omer Mihemed, da zanîn ku ew di nava 9 salan de gelek xizmên xwe winda kirine û got, “Wek malbat em 7 kes ji Efrînê derketin, lê niha tenê 3 kes vedigerin. Êşa me mezin e, lê em ê birînên xwe li ser axa xwe derman bikin. Divê her kes vegere warên xwe.”
‘EM Ê DÎSAN LI SER AXA XWE BIJÎN’
Ehmed Mûsa jî got, “Em vedigerin gundê xwe û cem darên xwe yên zeytûnan. Em ê dîsa li ser axa xwe bijîn,” û da zanîn ku veger ji bo wan tê wateya hêviyê.
‘JI KÊFXWEŞIYAN GIRIYAM’
Mihemed Şêxo Mûsa yê ji Cindirêsê, jî diyar kir ku ew bi salan e bêriya Efrîn dike û got, “Piştî Şehba, Tebqa û Kobanê, em niha vedigerin Efrînê. Ez îro ji kêfxweşiyê giriyam.”
