Ciwanê ji Efrînê A.B. ku di 4’ê Nîsanê de tevlî karwana duyemîn vegeriya warê xwe, wêne û dîmenên ku wî kişandibû ji ANF’ê re şand. Di axaftina telefonê de A.B. got, ‘Bajarê zeytûnê Efrîn li benda xwediyên xwe yên koçber e.”
Gelê Efrîn, di sala 2018’an de 58 rojan li dijî dewleta Tirk û komên girêdayî wê, berxwedanek mezin nîşan da. Di encama êrîşên hovane de bi hezaran kes koçber bûn û bi sedan sivîl ku jin û zarok jî nav de hebûn, jiyana xwe ji dest dan.
Piştî Efrîn di Adara 2018’an de hat dagirkirin, piraniya gel venegeriya malên xwe. Piştî salên dirêj ên koçberiyê, di peymana ku di navbera QSD’ê û Hikûmeta Demkî ya Sûriyeyê de di 29’ê Çile de hatibû îmzekirin, vegera ewle ya koçberan weke xalek sereke hat destgirtin.
Di vê çarçoveyê de, di karwana yekem de zêdetirî 400 malbat û di ya duyem de jî nêzîkî 200 malbat vegeriyan Efrînê. A.B., ku ji ber sedemên ewlehiyê nexwest navê xwe eşkere bike, di 3’yê Nîsanê de li Qamişloyê, dema ku bi malbata xwe re li ser rêya vegerê bû û xatir ji hevrêyên xwe dixwest gotibû, “Ma em ê bi rastî vegerin Efrîn?”.
A.B., beriya ku bi rê bikeve digot, “Ez ê biçim Efrînê, hemû gundan û bajarokên wê bigerim. Ez ê xwezaya ku bi salan e jê mehrûm mame bibînim û bihara Efrînê bikişînim.”
Karwana ku sibeha 4’ê Nîsanê bi rê ket, êvarê gihîşt Efrînê. A.B., kêfxweşiya xwe ya mezin a gihîştinê anî ziman û diyar kir ku ew ê li gundan bigere û dîmenên biharê bikişîne.
Efrîn, ku berê bi darên xwe yên zeytûnan dihat nasîn, piştî dagirkeriya sala 2018’an zirareke cidî giha jîngeha wê û ji 40 mîlyon zêdetir dar hatin birîn.
A.B., destnîşan kir ku navenda bajêr bi piranî guheriye, avahî û jiyanek bêserûber serwer e. A.B., her wiha diyar kir ku xizmet pir nebaş in û tiştên ku di medyayê de hatine ragihandin bi tevahî rastiyê nîşan nadin.
Tê gotin ku gundan bi piranî rewşa xwe ya berê parastine, lê çiya û daristanan zirareke mezin dîtine. Tevî vê yekê, A.B, tîne ziman ku bi saya barana zêde, ev bihar pir zindî bûye û xweza ji nû ve zindî bûye. A.B. got, “Kûlîlkên rengîn vekirine. Mîna ku vegera Kurdan silav dikin. Ev reng mîna sembola renga Kurdan in.”
A.B., destnîşan kir ku nasnameya Efrîn nayê guhertin û got ku kesên ku koçber bûne hêdî hêdî vedigerin û dê darên xwe hembêz bikin.
Karwana sêyemîn tê plankirin ku vê hefteyê ji Hesekê derkeve. Tê gotin ku vegera ku tê payîn bi qasî hezar malbatan di nav xwe de bigire, dê li gorî Peymana 29’ê Çileyê qonax bi qonax berdewam bike.
