Hevserokatiya Konseya Rêveber a KCK’ê bi wesîleya 1’ê Gulanê daxuyaniyek da û ji bo mezinkirina piştevanî û yekîtiyê, ji bo xurtkirina têkoşînê bang kir.
Daxuyaniya KCK’ê bi vî rengî ye:
“1’ê Gulanê ku Roja Yekîtî, Têkoşîn û Piştevaniyê ye, di serî de li çîna karker li hemû çînên bindest, kedkar, gelan, jinan, her kesên ji bo wekhevî, azadî û demokrasiyê têdikoşin pîroz dikin. Em şehîdên 1’ê Gulanê ku di têkoşîna çîna karker a li dijî sîstema mêtingeriyê de xwedî cihekî girîng e û di şexsê wan de jî hemû şehîdên şoreşê û demokrasiyê bi hurmet û minetdarî bi bîr tînin.
Li dijî modernîteya kapîtalîst a ku bi kedxwariyê hemû nirxên civakê talan dike, dest datîne ser nirxan, bi hêrsa qezenca herî zêde bi kes û civakê re bi sînor namîne û xwezayê jî talan dike, dike ku jiyan lê nebe, têkoşîna çîna karker xwedî cihekî girîng e. Têkoşîna sosyalîzmê ku bi 1’ê Gulanê û têkoşîna çîna karker re tê bîranîn, îro gihîştiye asteke gerdûnî û li dijî modernîteya kapîtalîst bûye têkoşîneke welê ku her kesên ji bo wekhevî, demokrasî û azadiyê têdikoşin xwedî lê derdikevin.
Sosyalîzm û têkoşîna sosyalîst ku li dijî jiyana bi serweriya mêr, mêtingerî û modernîteya kapîtalîst nîşaneya utopya jiyana dûrî ji mêtingeriyê ye, ji bo kes, civak û mirovahiyê her girîng e. Weke doh sosyalîzm îro jî ji bo mirovahiyê rêya bingehîn a hêja û rizgariyê ye. Li dijî cîhana mêtingeriyê ya modernîteya kapîtalîst ku roj bi roj zêde dibe û gefê li jiyana mirovan û xwezayê dixwe, îdeal û armancên ku sosyalîzmê destnîşan kiriye nirxên me yên herî bingehîn e ku em ti carî nikarin dest jê berdin.
Pêkanîna nirxên ji cewhera sosyalîzmê, cewhera têkoşîna me ye. Rêber Apo mirovbûyîn bi israra li ser sosyalîzmê û pêkanîna wê pênase kir û bi vî rengî ev rastî raxist pêş çavan. Têkoşîna Azadiyê ya Kurdistanê li ser bingeha van nirxan bi pêş ket û li ser bingeha van nirxan îro jî bi pêş dikeve. Di mijara pêkanîna sosyalîzmê de Rêber Apo gelekî bi israr e, bi îdîa ye û di nava hewldanan de ye. Rêber Apo bi ‘Banga Aştî û Civaka Demokratîk’ re ev helwesta xwe careke din nîşan da. ‘Banga Aştî û Civaka Demokratîk’ a Rêber Apo ji bo pêkanîna sosyalîzmê ya di vê serdemê de gaveke dîrokî ye. Ji xwe Civaka Demokratîk ji aliyê dîrokî ve tê wateya pêkhatina têkoşîna çîna karker û bindestan, jinan û gelan a li dijî jiyana mêtingeriyê ya modernîteya kapîtalîst. Ji ber vê yekê hewldana ji bo fêhmkirina vê banga dîrokî ya Rêber Apo û karkirina ji bo pêkanîna Civaka Demokratîk ji aliyê pêşvebirina têkoşîna sosyalîzmê ve gelekî girîng e. Weke tevger em destnîşan dikin ku helwesta me bi vî rengî ye û em li gorî vê di nava guherîn û veguherînê de ne.
Em careke din 1’ê Gulanê Roja Yekîtî, Têkoşîn û Piştevaniyê pîroz dikin banga pêşvebirina piştevanî û yekîtiyê dikin ku cewhera 1’ê Gulanê ye. Her wiha bang dikin ku li ser vê bingehê têkoşînê bilind bikin. Em bang li gelê xwe yê welatparêz dikin ku li ser bingeha ‘Banga Aştî û Civaka Demokratîk’ li gel karker, kedkar, jin û bindestan bi piştevaniyê bi xurtî xwedî li 1’ê Gulanê derkeve û pîroz bike. Têkoşîna li ser bingeha yekîtî û piştevaniyê ya gelan, karkeran, kedkaran û jinan wê cîhana mêtingeriyê ya modernîteya kapîtalîst hilweşîne, cîhane dûrî çînî, mêtingerî, jiyaneke azadiya jinê, demokratîk û ekolojîk ava bike.
Bijî 1’ê Gulanê”
