Hevserokatiya Konseya Rêveber a KCK’ê daxuyaniyeke nivîskî da û ev tişt diyar kir: “Li Kurdistan, Rojhilata Navîn û Cîhanê ji aliyê têkoşîna azadî û demokrasiyê ve geşedanên girîng diqewimin. Di demeke wiha de em di salvegera 40’an a Pêngava xwe ya Şoreşgerî ya 15’ê Tebaxê de ne.”
Di dewama daxuyaniyê de ev tişt hate destnîşankirin:
“Di serî de Rêber Apo, em Cejna Vejîn û Berxwedanê, Cejna Gerîla ya hemû hevrê, hêzên xwe yên gerîla, jin û ciwanan, gelê xwe û dostên xwe pîroz dikin. Di sexsê fermandarên nemir ên pêngava lehengiyê ya dîrokî hevrê Egît û Zîlan de, em hemû şehîdên xwe yên leheng bi rêzdarî, hezkirin û minetdarî bi bîr tînin û soza xwe dubare dikin ku armanc û bîranînên wan bidin jiyîn.
Dîroka gelê Kurd bi talan û îstilayê dagirtî ye. Netew dewletan beriya sedsalan polîtîkayên qirkirinê li ser gelê Kurd ferz kir û di encamê de gelê Kurd pirsgirêka hebûnê jiya. Bi darbeya faşîst a leşkerî ya 12’ê Îlonê re hewl hate dayîn ku ev polîtîkayên qirkirinê bi encam bibin. Li dijî van polîtîkayên qirkirinê yên ku gihiştin lûtkeyê, berxwedana mezin a dîrokî ya li Zindana Amedê bûye fermana rabûna ser piyan û xwedî derketina li rûmeta xwe.
PÊNGAVA EWILÎ 41 SALAN BÊNAVBER DOM KIR
Pêngava 15’ê Tebaxê li ser bingehê bicihanîna pêdiviyên vê zanebûn, îrade, biryar û bangê pêk hat. Ev pêngava ewilî bi yekbûna zanebûna ku ji aliyê Rêber Apo ve hatî afirandin, îradeya berxwedana li zindanê û cesareta di fermandariya Egît de derketî holê, hate avêtin û 41 salan bênavber dom kir. Li dijî êşên mezin, talan û qirkirinan bi berdêlan berxwedan hate raberkirin. Vê berxwedanê nîşanî dost, dijmin û her kesê da ku heq e. Qirkirina li hemberî Kurdan bi ser neket û nasnameya Kurdan hebûna xwe nîşan da. Zanebûna azadiyê ya jinan, rêxistinbûn û çalakiya wê derket holê û di asta gerdûnî de belav bû, ev yek bi saya vê şerê hebûnê pêş ketiye.
Pêngava 15’ê Tebaxê Tirkiye ji tarîtiya faşîzma 12’yê Îlonê derxist, hemû dînamîkên demokratîk ên Rojhilata Navîn parast û nehêla ku herêm bibe navenda paşverûtiya modernîteya kapîtalîst. Ji vê aliyê xwe, Pêngava 15’ê Tebaxa 1984’an û li ser vê bingehê şerê gerîla yê çil û yek salan, hemû geşedanên li Kurdistanê yên li ser navê hebûn û azadiyê diyar kirine, bûye dînamîka herî bingehîn a demokrasiyê li Tirkiye û Rojhilata Navîn û rola xwe ya ku ji bo tevahiya mirovahiyê çavkaniya herî xurt a hêviyê ye berdewam kiriye. Di vê wateyê de di çil salên dawî de li Herêmê û li Kurdistanê di warê azadiyê de çend geşedan rû dabe, di bin hemûyan de mor û îmzeya Pêngava 15’ê Tebaxê û şerê gerîla heye.
TÊKOŞÎNA DEMA NÛ
Di qonaxa ku em gihîştinê de, ji bo geşedanên dîrokî yên ku Pêngava 15’ê Tebaxê afirandine di siyasetê de bên bi cih kirin û domdar bin hewldan tên kirin. Rêber Apo jî ev dînamîka guherî wek “Ji sêdarê hatina ber masê” pênase kiriye. Pêvajoya Aşitî û Civaka Demokratîk encama vê têkoşîna bi heybet e. Têkoşîna dema nû ku wê bi heman îrade, hişmendî û berxwedaniyê bê pêşxistin, wê hebûna ku hate îsbatkirin bigihîne mercên jiyana azad.
Bi vê baweriyê em bang li hemû hevrêyan û gelê xwe dikin ku di salvegera çil û duyan de rastiya Pêngava 15’ê Tebaxê rasttir û baştir fêm bikin û bi ruhê 15’ê Tebaxê bi hêz tevlî têkoşîna avakirina jiyana azad bibin.
Bijî Pêngava me ya Şoreşgerî ya 15’ê Tebaxê!
Bijî Fermandarê me yê Mezin Hevrê Egît!”
