Meclisa Jinan a Partiya Wekhevî û Demokrasiyê ya Gelan (DEM Partî) ya Bagcilar a Stenbolê li ber avahiya DEM Partî ya navçeyê derbarê zêdebûna qetilkirina jinan de daxuyanî da çapemeniyê. Gelek jin beşdarî çalakiyê bûn. Pankartên “Rojîn hat bêdengkirin”, “Çi bi Rojînê hat?”, “Daxwaza me zelal e: Edalet!” û “Ji bo Rojîn Kabaîş edalet” hatin hilgirtin û dirûşma “Jin jiyan azadî” hat berzkirin.
Daxuyanî ji aliyê Hevseroka DEM Partiyê ya Bagcilarê Nurten Varlik ve hate xwendin.
Nurten Varlik xwest ku kujerên Rojîn Kabaîş bên dîtin, darizandin û got, “Bila ti kujer neyên parastin û veşartin. Bila ti agahî û delîlan veneşêrin.“
Nurten Varli anî ziman ku êrîşên li ser destketî û mafên jinana berdewam dikin û got, “Di nîviyê vê salê de 136 jin hatine qetilkin û 145 jin jî bi awayekî gumanbar jiyana xwe ji dest dane. Tenê di meha Îlonê de 20 jin hatin qetilkirin. Polîtîkayên şerê taybet ên ku ji bajarên Kurdan dest pê kiriye û li seranserê welat belav bûne berdewam dikin. Ev jî nîşan dide ku ewlehiya jiyana jinan tine ye. Me heta niha li hemberî êrîşan li ber xwe da û em ê ji niha pê ve jî li ber xwe bidin.”
