Parêzvana mafên jinan û mirovan a Îtalî Laura Quagliuolo, di nirxandina xwe ya li ser Pêvajoya Aştî û Civaka Demokratîk a bi pêşengiya Rêber Apo de, destnîşan kir ku ev pêvajo ji bo çareseriya demokratîk a pirsgirêka Kurd û demokratîkbûna Tirkiyeyê firsendek dîrokî pêşkêş dike. Laura Quagliuolo, diyar kir ku aştî bi awayekî yekalî pêş nakeve û destnîşan kir ku pêwîst e dewleta Tirkiyeyê gavên berbiçav û pêbawer bavêje.
Laura Quagliuolo, diyar kir ku aliyê Kurd bi awayekî zelal îradeya xwe ji bo pêvajoyê nîşan daye, lê gef û êrîşên berdewam ên Tirkiyeyê li dijî Bakur û Rojhilatê Sûriyeyê xizmetê aştiyê nake. Laura Quagliuolo, destnîşan kir ku tevî bangên Bahçelî yên ji bo diyalogê û helwsta PKK’ê ya ji bo berdewamiya pêvajoyê, siyaseta êrîşkar a Tirkiyeyê dewam dike û got, “Ez hêvî dikim ku ev siyaset bidawî bibe û Tirkiye îradeya aştiyê raber bike.”
‘DIVÊ OCALAN TAVILÊ AZAD BIBE’
Laura Quagliuolo, bal kişand ser rola Rêber Apo di pêvajoya aştiyê de û bi bîr xist ku Rêber Apo di 26 salên bihurî de bi berdewamî banga agirbestên yekalî kiriye. Laura Quagliuolo, Rêber Apo ne tenê wekî aktorekî siyasî, wekî Rêberê gelê Kurd bi nav kir û destnîşan kir ku ew tenê di şert û mercên azadiyê de dikare bi rastî beşdarî aştiyê bibe. Laura Quagliuolo, diyar kir ku azadiya Rêber Apo dê gava herî xurt be ku dilsoziya dewleta Tirkiyeyê ya di derbarê aştiyê de nîşan dide. Laura Quagliuolo, her wiha got ku berdana hemû girtiyên siyasî li Tirkiyeyê ji bo avakirina bawerî û lihevhatinê di navbera gelan de girînge û got, “Azadiya Abdullah Ocalan û berdana girtiyên siyasî nîşaneyên bingehîn ên aştiyê ne.”
‘OCALAN DIXWAZE DI VÊ PÊVAJOYÊ DE CIVAKEK NÛ AVA BIKE’
Laura Quagliuolo, diyar kir ku di navenda paradîgmaya aştiyê ya Rêber Apo de azadiya jinan û ji nû ve avakirina civakê heye û destnîşan kir ku têgihîştina aştiyê ya Rêber Apo, berevajî modelên klasîk ên ku ji jor ve ji hêla aktorên desthilatdar ve têne ferzkirin, nêzîkatiyek bingehîn e ku li ser bingeha jiyana hevpar a gelan e. Laura Quagliuolo, anî ziman ku armanca pêvajoyê, avakirina bawerî û çandan li ser bingeha hurmeta hevpar û avakirina civakek exlaqî û siyasî ye. Laura Quagliuolo, diyar kir ku aştiya rastîn pêvajoyek demdirêj e ku li ser bingeha ji nû ve avakirina civakî ye û got, “Divê aştî ji binî ve û ji bo berjewendiya gel were avakirin.”
Laura Quagliuolo, destnîşan kir ku ramanên Rêber Apo bi têra xwe li seranserê cîhanê nayên nîqaşkirin û pir caran bi zanebûn ji çarçoveya xwe ya siyasî têne derxistin. Laura Quagliuolu, Rêber Apo wekî yek ji ramanwerên herî girîng ên serdema me bi nav kir û diyar kir ku çareseriya neteweya demokratîk û civakek demokratîk ne tenê ji bo Rojhilata Navîn, di heman demê de li ser asta gerdûnî jî alternatîfek pêşkêş dike. Laura Quagliuolo got, “Ramanên Abdullah Ocalan potansiyela guhertina gerdûnî hildigirin.”
Laura Quagliuolo, anî ziman ku azadiya jinan yek ji aliyên herî cihêreng ên paradîgmaya Rêber Apo ye û got ku lêkolînên jineolojiyê di vî warî de girîng in. Laura Quagliuolu, diyar kir ku rêxistinbûna jinan û rola wan a pêşeng di veguherîna civakê de girîng e û got, “Paradîgmaya Ocalan girîngiyek taybet û navendî dide jinan. Divê jin di jinûve avakirina civakê de rolek pêşeng bilîzin.”
DIVÊ EM BERPIRSYARÎ BIGIRIN
Laura Quagliuolo, diyar kir ku raya giştî ya navneteweyî û bi taybetî jî derdorên mafên mirovan ên li Ewropayê, bi têra xwe xwedî li pêvajoyê derneketine û got ku divê ji bo azadiya Rêber Apo hestek berpirsiyariyê ya xurttir derkeve holê. Laura Quagliuolo, behsa girîngiya hewldanên ku di vê çarçoveyê de di asta rêveberiya herêmî de têne kirin kir û destnîşan kir ku ravekirina paradîgmaya Rêber Apo ji bo her kesî beşek yekgirtî ya vê têkoşînê ye. Laura Quagliuolo, diyar kir ku aştî bi hewldanek civakî ya demdirêj û piralî gengaz e û got, “Divê azadiya Abdullah Ocalan û belavkirina paradîgmaya wî bi hev re werin meşandin.”
