Koma ku li ber Komeleya Çand û Ziman a Birca Belek li hev civiya, bi drûşmên bi Kurdî ber bi Keleha Birca Belek a dîrokî ve meşiya. Di çalakiyê de pankarta bi nivîsa “Statuya Kurdî perwerdeya bi Kurdî ye” û dowîzên ji daxwaza perwerdeya bi Kurdî hatin hildan.
Li pêşiya kelehê rêveberê Komeleya Çand û Ziman a Birca Belek Cahît Akil daxuyanî xwend.
PERWERDEYA BI KURDÎ MAFEKÎ MIROVÎ YE
Hevserokê Şaxê Şirnexê yê Egîtîm-Senê Adnan Şenbayram jî li çalakiyê axivî û diyar kir ku bi milyonan zarok bi bêparmayina ji zimanê dayikê dest bi sala nû ya perwerde-hîndekariyê kirin. Şenbayran anî ziman ku Egîtîm-Sen salên dûr û dirêj e ji bo mafê perwerdeya bi zimanê dayikê têdikoşe û destnîşan kir ku mafek e ku her zarokek bi zimanê xwe yê dayikê perwerdeyê bibîne.
Şenbayram diyar kir ku divê Kurdî bibe zimanê perwerdeyê û ragihand ku dersên Kurdî yên hilbijartî ku li dibistanan tê pêşkêşkirin bersivê nade daxwaza perwerdeya bi zimanê dayikê. Şenbayram ji bo Kurdî bibe zimanê perwerdeyê banga dewamkirina têkoşînê kir.
Parlamentera Şirnexê ya DEM Partiyê Newroz Ûysal Aslan jî anî ziman ku zarok bi zimanê xwe yê dayikê hînî jiyanê dibin, lê belê li dibistanê ji vî zimanî bêpar dimînin.
Newroz Ûysal Aslan diyar kir ku Kurdî yek ji zimanên dîrokî yên herêmê ye, înkarkirina vÎ zimanî bandorê li nasnameya wî gelî jî dike û destnîşan kir ku daxwaza perwerdeya bi Kurdî mafekî mirovî ye.
DI ZIMAN DE DIVÊ WEKHEVÎ HEBE
Newroz Ûysal Aslan ragihand ku nîqaşên wekheviyê yên di çarçoveya “Pêvajoya Aştî û Civaka Demokratîk” de têne kirin, divê ziman jî bigire nava xwe û got, ew ê daxwaza ji bo statuya Kurdî û perwerdeya bi Kurdî di rojevê de bihêlin.
Çalakî bi dirûşmên “Bijî zimanê Kurdî” û “Zimanê me rûmeta me ye” bi dawî bû.
