Li Filîpînê di şerê navbera artêş û gerîlayên komunîst de herî kêm 19 kes mirin. Karbidestan daxuyandin ku di nav miriyan de du welatiyên DYA’yê jî hene.
Hate diyarkirin ku şer li nêzî Tobosoyê ya li Girava Negrosê qewimiye. Karbidestên rêveberiya karesatê ya herêmî ji AFP’ê re axivîn û ragihandin ku piştî dengê çekan, zêdetirî 300 gundiyan neçar mane malên xwe biterikînin.
Hêza peywirê ya hikûmetê, navên welatiyên Amerîkayê yên mirî wekî Lyle Prijoles û Kai Dana-Rene Sorem eşkere kir. Hat destnîşankirin ku her du kes nêzî mehekê beriya bûyerê hatine herêmê.
Karbidestan îdîa kir ku 19 kesên hatine kuştin endamên Artêşa Gel a Nû (NPA) ne. NPA wekî baskê çekdarî yê Partiya Komunîst a Filîpînê tê naskirin û demeke dirêj e li welat çalakiyan pêk tîne.
