Şêniyên taxa Şêxmeqsûd û Eşrefiyê yên Helebê beşdarî merasîma veşartina cenazeyên şervanên Yekîneyên Parastina Gel, Hêzên Rizgariya Efrînê û Hêzên Parastina Taxên Şêxmeqsûd û Eşrefiyê şehîd Henan (Ebdulhenan Mecanu), şehîd Amed Kobanî (Ciwan Mistefa) şehîd Diyar Efrîn (Idrîs Arnab) û şehîd Mamo (Şerîf Debûs) şehîd Rojhat Efrîn (Yeha Cuma) bûn.
Di merasîmê de her wiha nasnameyên şehîd Canyar Efrîn (Ehmed Biyabo), şehîd Mezlûm Heleb (Mihemed Mihemed), şehîd Berxwedan Heleb (Mihemed Mamo), şehîd Aldar Efrîn (Mihemed Elî Hesen) û şehîd Berxwdan Heleb (Ebdulezîz Ciwan) hatin eşkerekirin.
Merasîma oxirkirinê li pakrewangeha taxên Şêxmeqsûd û Eşrefiyê bi deqeyeke rêzgirtinê dest pê kir. Piştre rêvebera Meclisa Malbatên Şehîdan Zinarîn Efrîn axivî û bal kişand ser sûcên dewleta Tirk a dagirker ên li dijî pêkhateyên Sûriyeyê û wiha got: “Dagirker dê nekarin vîn û berxwedana gel bişikînin.”
Endamê Meclisa Leşkerî ya Helebê Zagros Heleb jî sersaxî ji malbatên şehîdan re xwest û got: “Bi fedakariya van şehîdan me êrîş têk birin, destkeftiyên xwe û axa xwe ji êrişên dewleta Tirk a dagirker parastin. Bi saya van şehîdan em ê vegerin Efrîna azad.”
Birayê şehîd Caniyar Efrînî jî soza şopandina rêya şehîdan da û got: “Em ê dest ji mafên xwe bernedin, em ê siberojeke geş ji bo welatê xwe ava bikin.”
Piştre belgenameyên şehadetê hatin xwendin û radestî malbatên şehîdan hatin kirin.
Cenazeyên şehîdan bi tilîliyan û dirûşmên dilsoziya bi şehîdan re hatin veşartin.
