Endamên Hêzên Ewlekariya Hundirîn Çîçek Efrîn (Nûr Mistefa) 6’ê Cotmehê di bersivdayîna êrîşên hêzên hikûmeta demkî yên li ser Şêxmeqsûd û Eşrefiyê şehîd bû, Nûrî Hemokan jî yê ku di heman berxwedanê de birîndar bibû û di 10’ê Cotmehê de şehîd bibû, îro bi merasîmekê hatin veşartin.
Di merasîmê de gerîlayê HPG’ê Mazlûm Şêrawa (Mihemed Elî Nasro) yê ku 18’ê Îlona 2025’an de li herêma Garê şehîd bibû, hat bibîranîn.
Girseyê cenazayên şehîd Çîçek Efrîn û Nûr Hemokan ji Nexweşxaneya Xalid Fecir a li beşa rojavayê taxa Şêxmeqsûdê wergirt û bi berzkirina dirûşmên diloziya bi şehîdan re û silavkirina berxwedana Şêxmeqsûd û Eşrefiyê ber bi Pakrewangeha Şehîdên Berxwedana Şêxmeqsûd û Eşrefiyê ya li herêma Şiqêf a li bakurê taxê ve bi rê ket.
Li pakrewangehê merasîmek hat lidarxistin. Piştî torana leşkerî ya Hêzên Ewlekariya Hundirîn, ji rêveberên Meclisa Giştî ya Taxên Şêxmeqsûd û Eşrefiyê Avaşîn Efrîn axivî. Avaşîn Efrîn diyar kir ku gelê Şêxmeqsûd û Eşrefiyê li hemberî êrişan destanek din a berxwedanê nîvisand.
Avaşîn Efrîn got: “Me bi îradeyeke mezin, bê çek li ber xwe da û em bi ser ketin.”
Ji rêveberên Hêzên Ewlekariya Hundirîn Zagros Heleb jî anî ziman ku dê xwîna şehîdan vala neçû û ev li gotinên xwe zêde kirin “Ji bo parastina taxên xwe me serî hildan û me bi îradeyeke ji pola li ber xwe da. Em ê bi pêkanîna mîsyona xwe bi rêk û pêk xwedî li şehîdên xwe derkevin.”
Di merasîmê de hevserokê Meclisa Olî ya Helebê Şêx Elî El Hesen jî got: “Şêniyên her du taxan çogê ji tu desthilatdaran re danayîne û îradeya wan li hemberî êriş û dorpêçê naşkê. “
Piştî axaftinan nasnameyên her sê şehîdan hatin xwendin û radestî malbatên wan hatin kirin. Cenazeyên şehîd Nûrî û Çîçek bi dirûşme û tilîliyên dayikan hate veşartin.
