Li bajarên Dêrik, Girkê Legê,Tirbespiyê, Til Hemîs û Til Koçer yên kantona Cizîrê ji bo şermzarkirina sûc û êrişên çeteyên hikumeta demkî yên destekê ji dewleta Tirk a dagirker digirin ên li ser taxên Şêxmeqsûd, Eşrefiyê û Benî Zêd ên Helebê, meşên girseyî hatin lidarxistin.
DÊRIK
Bi sedan şêniyên bajarê Dêrikê, tevî endamên saziyên xizmetguzarî û Yekitiya Mamosteyan ji Qada Azad ber bi sûka navendî ve meşiyan. Girseyê dirûşmên şermezarkirina sûcan berz kirin û wêneyên şehîdên berxwedana Şêxmeqsûd, Eşrefiyê û Benî Zêd hildan.
Girse li sûka navendî rawestiya û deqeyekê rêz girt. Piştre hevserokê Meclisa PYD’ê ya bajarê Dêrikê Ciwan Hesen axivî.
Ciwan Hesen di axaftina xwe de diyar kir ku li gelek welatan gel ji bo xwedîderketina li berxwedana Şêxmeqsûd, Eşrefiyê û Benî Zêd serî hilda û got: “Dema em dibêjin Kurd, em behsa berxwedanê dikin, ji ber Kurd bi berxwedana xwe û îradeya xwe ya azad li hemberî hemû planên qirkirinê rabûn.”
Hesen bang li rêxistinên mirovî û hiqûqî kir ku li hember sûcên ku têne kirin erkên xwe bi cih bînin. Her wiha bang li hêzên kurdî kir ku yekrêziya xwe xurt bikin.
Çalakî bi bezkirina dirûşmên silavkirina berxwedanê û dilsoziya bi şehîdan re bi dawî bû.
GIRKÊ LEGÊ
Li bajarê Girkê Legê jî bi heman armancê meşeke girseyî hat lidarxistin. Meşa ku sedan xwendekar û endamên Tevgera Ciwanên Şoreşger tev lê bûn, ji Qada Şehîd Xebat dest pê kir. Di meşê de wêneyên şehîd û birîndarên berxwedana Şêxmeqsûd, Eşrefiyê û Benî Zêd hatin hildan. Dirûşmên “Şehîd namirin” û “Bijî berxwedana Şêxmeqsûd û Eşrefiyê” jî hatin berzkirin.
Meş li sûka navendî veguherî mîtîngê û deqeyekê rêz hat girtin. Piştre bi navê Yekitiya Xwendekaran daxuyaniyek hat xwendin. Daxuyanî ji aliyê xwendekarên bi navê Racal Karker û Sozvîn Nîdal ve hat xwendin.
Di daxuyaniyê de hate gotin, di encama êrişên li ser van taxan de wêraniyeke mezin li binesaziya perwerdeyê bû û bi hezaran xwendekar ji mafê xwe yê fêrbûnê bê par man.
Hate gotin, tevî ku êrişên li pêş çavê dewletên mezin, Neteweyên Yekbûyî û rêxistinên mafên mirovan ên navneteweyî hatin kirin, lê helwesteke zelal ji aliyê wan ve nehat dayîn.
Di daxuyaniyê de bêdengiya herêmî û navneteweyî ya li hember êrişan hat şermezarkirin, berxwedana gelê Şêxmeqsûd û Eşrefiyê hat silavkirin û soza domandina rêya şehîdan hate dayîn.
TIRBESPIYÊ
Bi dehan şêniyên bajarê Tirbespiyê û bajarokên wê jî meşek li dar xist. Şêniyan di meşê de wêneyên şehîdên berxwedana Şêxmeqsûd û Eşrefiyê û wêneyên ku balê dikişînin ser sûcên ku çeteyan li van taxan kirine, hatin hildan.
Girse li pêşiya avahiya Komeleya Perwerdeyê heya navaraste bajêr ve meşiyan, silogana ` Bijî berxwedana Şêxmeqsûd û Eşrefiyê” û “Berxwedan Jiyan e” berz kirin.
Girse li naverasta bajêr sekinî û deqeyekê rêz girt. Piştre endama Meclisa Kongra Star a bajarê Tirbespiyê Xaliya Ehmed axivî û got ew tu carî ji êrişên çeteyên hikumeta demkî û yên dewleta Tirk a dagirker natirsin, Şêxmeqsûd û Eşrefiyê mînaka vê berxwedanê ne. Xaliyayê da zanîn ku ew bêdengiya dewletên navneteweyî şermezar dikin û got, bêdengî tê wateya hevkariya bi êrişkaran re.
Xaliya Ehmed destnîşan kir ku dê berxwedan û têkoşîna xwe li hemberî êrişan xurtir bikin û xwedî li destkeftiyên ku şehîdên me bi dest xistine derkevin.
Endamê Kongra Îslama Demokratîk Silêman Derwîş da zanîn ku çeteyên bi navê îslamê êrişî gel dikin, lê ew îslamê li gorî xwe didin meşandin. Silêman Derwîş êrişên li Şêxmeqsûd û Eşerfiyê şermezar kirin û bêdengiya hêzên cîhanî jî wek hevkariya wan bi êrişan re nîşan da.
TIL KOÇER
Meşa li Til Koçer ji pêşiya Parka Rêber Apo dest pê kir û li dawiya sûka bajar bi dawî bû.
Meş bi mîtîngan bi dawî bûn û axaftin hatin kirin. Di axaftinan de êrişên li ser Şêxmeqsûd, Eşrefiyê û Benî Zêde, bêdengiya li hemberî van êrişan hatin şermezarkirin. Her wiha peyamên piştgiriya bi QSD’ê re hatin dayîn.
Her wiha hate diyarkirin ku hikumeta demkî berpirsê van bûyeran e û bang li hêzên navneteweyî û rêxistinên mafên mirovan hat kirin ku ji bêdengiya xwe derkevin.
Kesên axivîne di kesayeta şehîd Ziyad Heleb û şehîdên berxwedana Şêxmeqsûd, Eşrefiyê û Benî Zêd de tevahî şehîdên azadiyê bi bîr anîn û li dijî êrişan banga hevgirtin û mezinkirina têkoşînê hatin kirin.
TIL HEMÎSÊ
Şêniyên bajarê Til Hemîsê jî ji pêşiya avahiya Saziya Temwînê heya ber bi navenda Hêzên Ewlekariya Hundirîn ve meşiyan.
Mîtîng bi berzkirina dirûşman bi dawî bûn.
