Meclîsa Partiya Jiyana Azad a Kurdistanê (PJAK) di duyemîn salvegera şehadeta Şehîd Şoreş Qelat de daxuyaniyek weşand.
Daxuyaniya PJAK’ê bi vî rengî ye:
“Li Îranê ku tarîtiya sitemkariyê zêdetirî sedsalekê ye sêbera xwe avêtiye ser ezman, çand, ziman û hebûna gelê kurd; rejîma Komara Îslamî hîn jî bi hemû hêza xwe ya qirêj hewl dide ku nasname û vîna azadîxwaziyê zuha bike. Siyaseta pakijkirin û tunekirinê, ne tenê bûyereke demkî ye, belku stratejiyeke kûr û kevnar a vê rejîmê ye ku ti daxwazên mafxwazî û ti tevgereke azadîxwaz a gelê me qebûl nake û bersiva her berxwedan û têkoşînekê bi tundûtûjiyeke rût û şêwazên kirêt dide.
Di nav hezaran tawanên ku Komara Îslamî ya Îranê di bernameya xwe ya reş de tomar kirine, şehîdbûna hevalê me yê qehreman Şoreş Qelat (Mewlan Rostemî) hîn jî wekî birîneke nû û kûre li ser laşê tevgera azadîxwaziya Kurdistanê. Ew li ser rêya Pîranşar û Mehabadê, ji aliyê hêzên Îtîlaatê ve bi hevkariya Pasdaran û çekdarên cerdevan, ketibû kemîneke namerdane û di encama şerekî rasterast de şehîd bû. Piştî vê tawana hov, rejîmê ji bo veşartina rûyê xwe yê reş, senaryoyeke sexte derxist pêş û îddîa kir ku wan ‘komeke çekdar ku ji sînorên Herêma Kurdistanê derbasî hundir bûbûn’ ji nav birine.
Niha di duyemîn salvegera şehadeta têkoşer Qelat de, em wekî Meclîsa PJAK’ê bîranîna wî geş dikin. Navê wî her tim bi evîna azadiyê ve girêdayî ye. Xwîna wî, mîna xwîna hezaran şehîdên din, agirê berxwedanê di dilan de geştir kir. Şehîd Şoreş mînaka şoreşgerekî zindî û çalak bû ku şev û roj bi coş û kelecaneke mezin di nav gel de li bajarên cuda yên Rojhilatê Kurdistanê û bi taybetî li devera Mukriyanê xebat dimeşand; ji ber vê yekê mîraseke pir dewlemend a destkeftiyan li pey xwe hişt. Wekî endamekî meclîsa PJAK’ê, wî erka xwe ya pêşengtiyê bi awayekî herî baş, bê tirs, bi dildarî û li dijî dijmin û sîxuran bi serkeftî bi cih anî.
Em careke din radigihînin ku bîranîna dîrokî ya gelê Kurd nayê birîn û ji bîr nabe. Hevrê Şoreş bi sadebûna xwe ya şoreşgerî û li beramber keda ku ji bo gel afirandibû, bû rênîşander. Rêya hevrê Şoreş Qelat û tevahiya şehîdên azadiyê, hîn jî çirayeke geşe ji bo ronîkirina rêya me. Heta ku ev pergala sitemkar a tarî bi dawî dibe û rûmeta mirovahiyê, azadî û aştî li ser vê xakê serdikeve, emê ala têkoşînê bilind bihêlin. Bîranîna wî her bilind û rêya wî her tim tijî şopdêr be.”
