Li gorî rapora Rêxistina Mafên Mirovan a Hana li Rojhilatê Kurdistanê di nava çend rojên borî de sê jîngehparêz hatin binçavkirin û welatiyek jî bi cezayê girtîgehê hate cezakirin.
Rêxistina Hana destnîşan kir ku di 23’yê Kanûnê de jîngehparêz Şêrko Kanî Sananî yê ji bajarê Merîwan a Rojhilatê Kurdistanê, piştî tevlî merasîma çalakiya jîngeparêziyê ya li pêngava Zagrosan ku li gundê Nê hate lidarxistin bû, ji aliyê hêzên ewlekariya Îranê ve bêyî fermana dadwer hate binçavkirin û ber bi cihek nediyar ve hate birin.
Her wiha Hana da zanîn ku di 22’yê Kanûnê de, Sedûn Pirinyan ê xelkê bajarokê Şino ya ser bi Urmiye ya Rojhilatê Kurdistanê, ji aliyê dezgeha dadweriya Îranê ve bi sûcê ‘ewlehiyê’ bi 5 sal cezayê girtîgehê hate mehkûmkirin. Sedûn piştre ji bo girtîgeha navendî ya bajar hate şandin.
Rêxistina Mafê Mirovan a Hana ragihand ku di 21’ê Kanûnê de jî Adil Yusif Nejad û Ako Yusif Nejad (bav û birayê jîngehparêz Çiyako Yusif Nejad ê jiyana xwe ji dest da), piştî ji bo îdareya Îstîxbaratê ya Sineyê hatin bangkirin, hatin binçavkirin. Li gorî agahiyan sedema bangkirina her du welatiyan, ji ber beşdarbûna merasîma roja Îniyê ya çalakiya jîngehê ya li bajarê Sineyê bû.
Jîngehparêz Çiyako Yusif Nejad roja 27’ê Tîrmeha îsal di dema vemirandina şewata li çiyayê Awyer de, di rêjeyek zêde de şewitî. Piştî 4 rojan li nexweşxaneyê ma, ji ber birînên xwe yên giran, jiyana xwe ji dest da.
Li gorî heman rapora Hana, tevî derbazbûna sê heftiyan bi ser binçavkirina Îsmaîl Mehmûdiyan ê ji bajarokê Şino ya ser bi Urmiye ya Rojhilatê Kurdistanê, heta niha ti agahî li ser çarenûsa wî nehatiye wergirtin.
