Platforma Ked û Demokrasiyê ya Karşiyaka ya Îzmîrê meşa aştiyê li dar xist. Meş li ber Karşiyaka ÎZBAN’ê dest pê kir û heta têketina sûkê berdewam kir. Di meşê de pankarta “Ger çiya, mirov û heta mirin jî westiyayî bin, helbesta herî xweş aştî ye” hilgirtin. Di meşê de timî dirûşmeyên “Jin, jiyan, azadî” û “Bijî xwişk-biratiya gelan” berz kirin. Parlamenterê Partiya Wekhevî û Demokrasiyê ya Gelan (DEM Partî) yê Îzmîrê Îbrahîm Akin, nûnerên rêxistinên civaka sivîl û gelek welatî beşdarî çalakiyê bûn. Jinan jî bi erbanê beşdarî meşê bûn.
Piştî meşê, Parlamenterê DEM Partiyê yê Îzmîrê Îbrahîm Akin axivî û bal kişand ser şerê ku li cîhan û Tirkiyeyê kûrtir dibe û lomser girîngiya parastin û civakîbûna aştiyê rawestiya û got, “Em dixwazin pêvajoya aştî, demokrasî û wekheviyê ava bikin. Ger em xwedî lê dernekevin wê encama ku hikûmet dixwaze deekeve holê.”
‘AŞTÎ PÊWÎSTIYA BINGEHÎN E’
Li ser navê girseyê Zelîha Danyelî axivî û diyar kir ku destketiyên li deverên şer tên wêrankirin, herî zêde jin û zarok êşê dikişînin. Zelîha Danyelî bêdengiya civaka navneteweyî ya li hember êrîşên Îsraîlê yên li ser Xezeyê bi bîr xist û bertek nîşanî sûcên şer ên ku ji aliyê HTŞ’ê ve li Sûriyeyê hatine kirin, da. Zelîha Danyelî wiha axivî: “Em dikarin aştiyeke mayînde bi dest bixin. Daxwaza aştî û demokrasiyê ji bo hêzên ked û demokratîk wekî nan û avê pêwîst e.”
‘EM Ê DEV JI DAXWAZA AŞTIYÊ BER NEDIN’
Danyelî komkujiya DAÎŞ’ê ya ku di 10’ê Cotmeha 2015’an de li Îstasyona Trenê ya Enqereyê pêk anî, bi bîr xist û got, “Em şehîdên aştiyê bi rêzdarî û bi hesret bi bîr tînin. Heta ku hemû berpirsiyarên komkujiyê, yên ku erkên xwe paşguh kirine û yên ku hiştine ev yek çêbibe, bên darizandin, em ê têkoşîna me ya ji bo edaletê berdewam bikin. Heta ku cîhanek wekhev, azad, laîk û hevgirtinê bê avakirin, em ê dev ji têkoşîna xwe ya ji bo aştiyê bernedin.”
Piştî daxuyaniyê, girse govenda aştiyê gerand û dawî li çalakiya xwe anî.
