Lêkolîn, ku di kovara Nature Mental Health de hate weşandin, li ser wêneyên MR yên mêjiyê zêdetirî 10 hezar zarokên 9-10 salî yên li Dewletên Yekbûyî hatiye kirin.
Li gorî lêkolînê, li eyaletên wekî Florida, California, New York û Connecticutê, ku newekheviya dahatê zêde ye, têkiliyên di navbera herêmên mêjiyê zarokan de lawaztir derketine holê.
Her wiha, hate diyarkirin ku qebareya korteksa mêjiyê van zarokan biçûktir e, ku ev yek dibe sedema pirsgirêkan di warên bîr, ziman û kontrolkirina hestan de. Hate destnîşankirin ku ev encam ne tenê ji bo zarokên ji malbatên xizan, lê herwiha ji bo zarokên ji malbatên dewlemend jî derbasdar in.
Zanyaran dîtin ku newekheviyên civakî bandoreke neyînî li tenduristiya derûnî ya zarokan jî dikin. Berevajî vê, li eyaletên wekî Utah, Wisconsin, Minnesota û Vermontê, ku bêtir wekhevî heye, ev bandorên neyînî kêm hatine dîtin.
Prof. Kate Pickett ji Zanîngeha Yorkê destnîşan kir ku ev encam ne tenê meseleyeke aborî, lê di heman demê de meseleyeke tenduristiya giştî ye jî û got: “Newekhevî jîngeheke civakî ya jehrî diafirînin ku rasterast bandorê li pêşveçûna zarokan dike. Ev bandor dikarin di tevahiya jiyana wan de berdewam bikin.”
Lêkolîneran ji bo kêmkirina newekheviyan hin pêşniyar jî rêz kirin: pergaleke bacê ya pêşverû, ewlehiya civakî ya bihêz, veberhênan li binesaziya giştî û pergaleke tenduristiyê ya gerdûnî ya bi bandor. Hate gotin ku ev polîtîka dê stresên li ser zarokan kêm bikin û jîngeheke tenduristtir ji bo pêşveçûna wan peyda bikin.
