Di navbera artêş, komên cîhadîst û serhildêrên Tuareg de li Maliê dîsa şer giran bû. Hat ragihandin ku şer bi taybetî li Kidal û herêma Kati ya nêzîkî paytextê, giran e.
Serhildêrên Tuareg, diyar kirin ku ew bi Rûsyayê re lihevkirinek kirine ku ji Kidalê vekişin. Berdevkê wan Mohamed Ramdane ji AFP’ê re axivî û diyar kir ku wan li dijî kampeke hêzên Rûsyayê ya li Kidalê operasyon pêk anîne û got, “Em dixwazin hêzên Rûsyayê yên dawî ji herêmê derxin.”
Kidal berê bi piştgiriya artêşa Malî û Wagner ku hêza paramîlîter a Rûsyayê ye ketibû bin kontrola hikûmetê. Lê Eniya Rizgariya Azawad (FLA), ragihand ku wan di rojên dawî de li herêma Gaoyê çend çeperên leşkerî girtine bin kontrola xwe.
Şer tenê li bakur sînordar nema. Li nêzî paytext Bamako, di navbera artêş û cîhadîstan de jî şer rû dan. Çavkaniyên xwecihî, ragihandin ku cîhadîst xwe li girên derdorê bicih kirine û êrîşên hewayî têne kirin.
JNIM a girêdayî El Qaîde jî berpirsiyariya êrîşên li ser çend avahiyên hikûmetê li Bamako girt ser xwe. Hat ragihandin ku ev êrîş bi serhildêrên Tuareg re bi rengekî koordînekirî hatine kirin.
Piştî êrîşên ku Serokkomar Assimi Goïta û Wezîrê Parastinê Sadio Camara hedef digirtin pêk hatin, li paytextê tedbîrên ewlehiyê hatin zêdekirin.
Ji sala 2012’yan û vir ve li Malî şer û pevçûnên di navbera komên çekdar ên girêdayî El Qaîde û DAÎŞ’ê, tevgerên serxwebûnê û milîsên çekdar berdewam dikin û welat hîn jî di nava krîzeke ewlehiyê de ye.
