Di pêşengtiya Stêra Zêrîn û Stiya Nexşî de hem wext li Wargeha Penaberan a Şehîd Rustem Cûdî (Mexmûr) û Şengalê biboneya 12’emîn salvegera Jenosîda sala 2014’an ya ji aliyê çeteyên DAIŞ’ê ve li ser civaka Êzidî hatî pêkanîn, belgefilma Hêza ya têkildarî êrişê hat nîşandan.
Dokûmanter li Saziya Malbatên Şehîdan a Mexmûrê bi amadebûna gel, bi deqeyek rêzgirtinê ji bo tevahî şehîdên doza azadiya Kurdistanê destpê kir. Beriya belgefilim bê temaşekirin Endama Çand û Hunerê ya Mexmûrê Mamosta Helen Hilalî li ser giringiya rojê axivî.
Helen di destpêka axaftina xwe de Jenosîda 2014’an ya li ser civaka Êzidî hatî pêkanîn şermezar kir û wiha got: “Em wek gelê Kurd hertim di nava şerê man û nemanê de ne. Me di oxira azadiyê de gelek berdêlên giran dan. Sîstema desthilatdar jî hertim xwestiya gelê Kurd qir bike. Her car bi navek cûda êrişên xwe pêktînin. Her wiha di sala 2014’an de bi avakirina çeteyên DAIŞ’ê xwestin vê armanca xwe pêkbînin. Bi taybet ji ber ku civaka Êzidî sosyolojiya xwe ya civakî parastine, kirin armanca êrişên xwe yên hovane. Xwestin civaka Êzidî ji holê rakin. 3’yê Tebaxa 2014’an gelê Şengalê bi êrişek hovane re rû bi rû ma. Ev êriş destpêka fermana 74’an bû. Van fermanan 74 birînên kûr li pey xwe hiştiye. Lê hertim li hemberî hemû êrişan jî civaka Êzidî heyîna xwe parastine.”
Piştî axaftinê dokûmantera ‘Hêza’ ya ku têkildarî êrişên çeteyên DAÎŞ’ê yên 2014’an ên li ser Şengalê hate nîşandan.
