Bi dehan şêniyên bajarê Qamişlo û Meclisa Malbatên Şehîdan cenazeyê şervanên Hêzên Sûriyeya Demokratîk (QSD) şehîd Ristem û Deştî Amanos li pakrewangeha Şehîd Delîl Saroxan veşartin.
Şehîd Rustem (Damên El Damên ) li Dêrazorê 24′ ê Îlona 2025’an, di pêkanîna karê xwe de şehîd û şehîd Deştî Amanos (Mistefa Hanan ) di encama birîna wî ya ji sala 2022’yan ve, îro li bajarê Qamişlo şehîd bû.
Bi dehan şêniyên bajêr, Meclisa Malbatên Şehîdan, Kongra Îslama Demokratîk û hevalên herdu şehîdan amade bûbû. Endamê Meclisa Malbatên Şehîdan Cibraîl Mistefa axivî û got: “Em di şexsê her du şehîdan de hemû şehîdan bi bîr tînin û bejna xwe li hember wan ditewînin. Şehîd namirin, her tim di dilê me de ne. Îro rojeke dîrokî ye bi şehadeta herdu şehîdan; Kurd û Ereb ku di pêkanîna biratiya gelan û jiyanek bi azad û ewle de jiyana xwe feda kirin.”
Piştre endamê Hêzên Erka Xweparastinê Ehmed Îbrahîm axivî: “Em sersaxiyê ji herdu malbatan re dixwazin, îro di hizûra van herdu şehîdan de em soz didin û her tim soza xwe nû dikin û heya dilopa xwîna di canê me de heye em ê li ber xwe bidin, ji ber ku em şervanên Rêber Apo ne û tu carî em dev ji riya xwe bernadin.”
Endamê Kongreya Îslama Demokratîk Omer El Hemîd axivî û got: “Em hemû şehîdên azadiyê bi bîr tînin. Şehîdan ji bo ku em azad bijîn canê xwe feda kirin. Çiqas em bêjin jî em nikarin mafê wan bidin.”
Piştî axaftinan wesîqeya şehadeta şehîdan hat xwendin û radestî malbatên wan hatin kirin.
Cenazeya şehîd Deştî Amanos li pakrewangeha Şehîd Delîl saroxan û cenazeya şehîd Ristem li pekrewangeha Şehîd Xebat Dêrik a bajarê Dêrikê hatin veşartin.
