Bi hezaran şêniyên Qamişloyê beşdarî merasîma veşartina cenazeyên 5 şehîdên Hêzên Sûriyeya Demokratîk (QSD) û Hêzên Ewlekariya Hundirîn-Jin bûn. 5 şervan di encamên êrîşên hewayî yên dewleta Tirk a dagirker û çeteyên wê de li Qamişlo, Minbic û Helebê şehîd bûbûn. Merasîm li Pakrewangeha Şehîd Delîl Sarûxan a li Qamişlo pêk hat.
Şervanê QSD’ê şehîd Harûn Qamişlo (Şêxmûs Yûsif), şehîd Mezlûm Qamişlo (Ferhad Xelîl) û şehîd Mûrad Qamişlo (Ebdulmecîd El Diyab) hatin spartina axê, ji bo endama Hêzên Ewlekariya Hundirîn şehîd Mizgîn Kurdo û şervanê QSD’ê yê Hêzên Komandos şehîd Zagros Qamişlo (Ehmed El Mihemed) jî merasîma xiyabî pêk hat.
Di merasîmê de malbat, hevrê û dostên şehîdan, endamên partiyên siyasî, Kongra Star û saziyên civaka sivîl amade bûn. Şêniyan ji ber morga li taxa Enteriyê heta pakrewangehê ya li taxa Meyselûn meşiyan.
Piştî deqeya rêzgirtinê li Pakrewangeha Şehîd Delîl Sarûxan, endamê Meclisa Malbatên Şehîdan a Qamişloyê Mihemed Ebas sersaxî ji malbatên şehîdan re xwest. Mihemed Ebas diyar kir ku wan bi şehîdan gava yekemîn a Şoreşa 19’ê Tîrmehê avêtiye, ew li ser rêya şehîdan têkoşîna xwe berdewam dikin.
Mihemed Ebas da zanîn ku ew xwedî felsefeya Rêber Apo, çi qasî berdêlên giran di oxira azadiyê bidin jî ew ê heta dawiyê gavekê bi paş de neavêjin.
Endamê Meclisa Leşkerî ya Qamişloyê Reşo Qamişlo jî destnîşan kir ku herêma Bakur û Rojhilatê Sûriyeyê di qonaxên hestiyar de derbas dibe, li gorî wê jî di asteke bilind de berxwedana gelan heye û got: “Di rojên nêz de mizgîniyên me ji bo gelê me hene.”
Endama Rêveberiya Hêzên Ewlekariya Hundirîn Mihdiya Hilal got, şehîd Mizgîn Kurdo ji hevalên wan ên bi cesaret û jîr bû û soza wan berdewamkirina xeta şehîdan e.
Endamê Kongra Îslama Demokratîk Casir Salih diyar kir ku li herêmê pêkhate bi hev re, bê cudahî dijîn û got: “Kesên ku durûtiyê dikin, cihê wan wê di nava me de tune be.”
Berdevka Kongra Star Rîhan Loqo jî axivî û da zanîn ku gel bi têkoşîna xwe tu carî li hember êrişan serî netewand, dayikan mîlîtanên azadiyê gihandin. Şehîdên me ji bo parastina nasnameya gelan û mîsogerkirina jiyaneke aram ji zarokan re li hember hemû hêzên dagirker li ber xwe da û got: “12 sal e ji bo têkbirina projeya neteweya demokratîk û şoreşa ku jin pêşengiya wê dikin, êriş hene. Soza me ji bo şehîdan ew e ku em di xeta azadiyê de têkoşîna xwe berdewam bikin.”
Piştî axaftinan, wesîqeyên her pênc şehîdan hatin xwendin û radestî malbatên wan hatin kirin.
Di merasîmê de birayê şehîd Mezlûm Qamişlo, Feysel Xelîl û xalê şehîd Harûn Qamişlo, Welîd El Xefo jî axivîn û diyar kir ku ew ê rê nedin tevliheviyên ku dewleta Tirk a dagirker derdixe.
Dûre malbat û hevrêyên şehîd Harûn Qamişlo, Mezlûm Qamişlo û Mûrad Qamişlo cenazeyên wan rakirin ser milan û spartin axê.
