6’emîn Kongreya Meclîsa Xweseriya Demokratîk a Şengalê (MDXŞ) ya asayî ku bi dirûşmeya ‘Yekîtî, Azadî û Çareserî tê lidarxistin, li Geliyê Kersê ya Şengalê bi coş û hêviyeke mezin destpêkir. 6.Kongreya MXDŞ’ê her çiqas weke kongreyeke asayî tê lidarxistin jî, ji ber rewşa şer a li Rojhilata Navîn û guherînên ku wê di Hevpeymana Civakî de werin kirin, weke kongreyek guherîn û veguherînê tê nirxandin. Her wiha tê payîn ku derbarê çareserkirina pirsgirêkên bi Iraqê re li ser esasên Desûra Bingehîn û di çarçoveya entegrasyona demokratîk de jî kongre nirxandinên nû bike û xwe bigihîne biryarên nû.
Derdora 250 delegeyên ji endam û nûnerên saziyên Rêveberiya Xweser a Şengalê, tevgera jin û ciwanan, older û eşayiriyên Şengalê, nûnerên pêkhateyên Şengalê di kongrê de amade ne. Her wiha YNK, Hereke, Teqedûm û Hevpeymana Doza Êzidiyan jî di nav de gelek aliyên siyasî û civakî yên Şengalê, kesayetên serbixwe jî bi dehan mêvan beşdarî kongreyê bûne.
KONGREYA YEKÎTÎ, AZADÎ Û ÇARESERÎ
Kongre bi rêzgirtina bîranîna şehîdên 74 fermanan û şehîdên azadiyê destpêkir. Piştî rêzgirtinê Hevserokê MXDŞ’ê Nayif Şemo axaftina vekirinê kir. Nayîf Şemo bibîrxist ku kongreya yekem di 2015’an de hate lidarxistin û wiha axivî: ‘’Xebatên Rêveberiya Xweser li ser vê esasê destpêkir. Li muqabilê saziyên dewletê, me jî saziyên xwe yên civakî û demokratîk ava kir. Hêzên me yên parastinê, partiya siyasî hemû li ser vê esasê hatin avakirin. Niha di têkiliyên me yên bi dewletê re kêmasî hene, lazim e guherînên pêwîst were kirin. Em hêvî dikin ev kongre bibe wesîleya yekitiya civakî, siyasî, leşkerî ya hemû Êzidiyan. Em serkeftinê ji kongrê re dixwazin.’’
Di kongrê de li ser navê Malbatên Şehîdan û Tevgera Azadiya Jinên Êzidî (TAJÊ) jî peyam hatin xwendin. Peyama Malbatên Şehîdan ji aliyê Dayê Pakîz ve hate dayîn. Dayê Pakîz di peyama xwe de anî ziman ku ji bo parastin û rizgarkirina Şengalê çendîn zarokên Êzidî şehîd bûne û got: ‘’Em hêvî dikin ev kongre bibe kongreya yekîtî û serkeftinê. Em hêvî dikin Êzidî û dostên wan serkeftî bin. Hêviya me tifaq û serkeftina gelê me ye.’’
‘JI BO ŞENGALA AZAD, CIVAKA AZAD, JINA AZAD TÊKOŞÎNA XWE BERDEWAM BIKIN’
Berdevka TAJÊ Riham Hico jî peyama jinên Êzidî gîhand kongreyê. Riham Hico destnîşan kir ku lidarxistina vê kongrê di nav rewşa şer a li herêmê de gelekî girîng e û wiha axivî: ‘’Em jî weke civaka Êzidî ji bo çareseriya xwe nîqaş bikin li vir kom bûne. Di nav 10 salan de têkoşîneke mezin hate dayîn. Çawa ku bi pêşengiya YBŞ û YJŞ’ê berxwedana parastinê hate kirin, bi pêşengiya Rêveberiya Xweser jî têkoşîneke mezin a siyasî û civakî hate meşandin. Hevalên me yên ku ji bo civaka xwe cane xwe dan, digotin em deyndarê gelê xwe ne. Em jî deyndarê gelê xwe ne, deyndarê zarokên şehîdan e, deyndarê malbatên şehîdan e. Ji bo Şengala azad, civakeke azad û jina azad emê têkoşîna xwe berdewam bikin.’’
‘HELWESTA JINÊN ÊZIDÎ ZELAL E’
Berdevka TAJÊ Riham Hico diyar kir helwesta jinên Êzidî ji bo têkoşîna Şengala azad zelal e û wiha berdewam kir: ‘’Ji bo yekîtiya civaka me, ji bo entegrasyona demokratîk, ji bo çareseriya demokratîk çi bikeve ser milê me em amade ne. Emê li Çiyayê Şengalê û Ezdatiyê bifikirin. Li gor vê emê nîqaşên xwe bikin. Ne tenê Şengal, Êzidiyên li Rojava, Bakur û bi taybet yên Başûrê Kurdistanê di bin xeteriyê de ne. Ev hemû di bin berpirsyariya me de ne. Em hemû di ber Ezdatiyê de, di ber pirsgirêkên civakî de berpirsyar in. Divê em nîqaşên xwe li ser esasê tifaq, çareserî û azadiyê bimeşînin.’’
Kongre bi xwendina peyamên niviskî yên saziyên civaka Êzidî yên Ewropa, Ermenîstan û Rojavayê Kurdistanê berdewam dike. Her wiha ji Sekreteryaya Îmraliyê Veysî Aktaş û Hevserokê PYD’ê Xerîb Hiso jî peyamên xwe yên bi dîmen gîhandine kongreyê.
Piştî xwendin û temaşekirina peyaman, wê ji bo rêvebirina kongreyê dîwan were hilbijartin.
