Bi wesîleya salvegera 18’emîn a komkujiya ku wekî fermana 73’yemîn a gelê Êzidî tê bibîranîn, ku di 14’ê Tebaxa 2007’an de li bajarokên Tilizêr, Komelgeha Sîba Şêx Xidir û gundê Izêr ên Şengalê bi awayek hemwext pêk hat, merasîmek bîranînê hat lidar xistin.
Di encama êrîşan de 321 kes hatibûn qetilkirin û nêzî hezar kes jî birîndar bûn. Qurbaniyên ku hin ji wan di gorên komî de hatibûn veşartin, hîn jî nasnameyên wan nehatine tesbîtkirin û cenazeyên wan radestî malbatên wan nehatine kirin.
Merasîma bîranînê bi tevlîbûna Tevgera Azadiya Jinên Êzidî (TAJÊ) û Rêveberiya Xweser a Şengalê li goristana komî ya Şêx Mend ku dikeve başûrê çiyayê Şengalê hate lidarxistin.
Di merasîma bîranînê de Hevseroka Meclîsa Xweseriya Demokratîk a Şengalê (MXDŞ) Nayif Şemo, axivî û diyar kir ku wê demê Şengal di bin kontrola pêşmergeyên PDK’ê de bû û got ku lê PDK’ê Êzîdî neparastine.
Endamê Rêveberiya Xweser a Şengalê Azad Hisên jî ji Rojnews’ê re axivî û diyar kir ku di êrîşê de bi sedan kes, ku 23 ji heman malbatê bûn jiyana xwe ji dest dane û 75 kes di gora komî ya duyemîn de hatine dîtin. Azad Hisên, da zanîn ku 18 sal in gorên komî nehatine vekirin û got ku divê naskirin bi rêya testên DNA’yê were kirin.
Azad Hisên, her wiha diyar kir ku armanca êrîşê tunekirina civaka Êzîdî bûye û da zanîn ku zêdetirî 320 kes hatine qetilkirin û hin ji wan hîn jî winda ne. Azad Hisên, diyar kir ku cilê Şêx Hadî, ku pîroz tê hesibandin, di êrîşê de bi xwînê sor bibû.
Endama TAJÊ Pakîze Elyas, jî anî ziman ku di êrîşa bi çar kamyonan bombebarkirî de bi sedan Êzîdî jiyana xwe ji dest dane, cihê hin ji qurbaniyan hîn jî nayê zanîn û got ku gorên komî hîn jî nehatine vekirin.
