Meclisa Malbatên Şehîdan a Til Temirê li pakrewangeha şehîdan bi amadebûna malbatên şehîdan, endamên saziyên civaka sivîl û xelkê bajêr daxuyaniyek da. Daxuyanî bi zimanê erebî ji hêla mamoste Ayhan El Yûnis û bi zimanê Kurdî ji hêla mamoste Rûdî Reso ve hatin xwendin.
Di daxuyaniyê de hat gotin ku ev hilbijartin vîna rast a pêkhateyên herêmê nîşan nadin, berovajî wek pêkanîna siyasetên dûrxistinê hatin kirin û bi hêviyên gelên herêmê re dijber in. hikumeta demkî ya Sûriyeyê hîna bi zihniyeta dişibihe ya rejîma Baasê tev digere.
Di dewama daxuyaniyê de hat destnîşankir ku Kurdan di van hilbijartinan de nûnertiya rastîn bi dest nexistin û kesên hatine tayînkirin nûnertiya gelê Kurd nakin, têkoşîn û fedakariyên wan temsîl nakin. nûnertiya kêm ne li gorî mezinahiya fedakariyên ku bi hezaran şehîdan ji bo parastina azadî û rûmetê kirine, ye.
Meclisê daxwaz kir ku divê di destûra Sûriyeyê de bi awayekî zelal mafên gelê Kurd, ziman û çanda wî were naskirin.
Di dawiyê de meclisê bang li xelkê herêmê kir ku yekrzêiya xwe xurt bike, girêdayî pransîbên azadî û edaletê be û got ew ê parastina destkeftiyên şoreşê, fedakariyên şehîdan dewam bikin û aliyên îdiaya nûnertiya gel bêyî vîna wî ya rast dikin red kir.
Li Tirbespiyê jî bi heman mijarê, daxuyanî hat dayîn. Endamê rêveber ê Meclisa Malbatên Şehîdan Hisên Xalid li Pakrewangeha Şehîd Dilşêr a gundê Dugirê daxuyanî xwend.
Di daxuyaniyê de hat diyarkirin ku vîna gelê Sûriyeyê ji hêla rejînên desthilat ve nayê naskirin, pêkhate bi taybet jî pêkhateya Kurd di rewşa paşguhkirin û dûrxistina berdewam de ne.
Di dawiyê de daxwaz hat kirin ku divê di parlamentoyê û tevahî saziyên serweriyê yên Sûriyeyê nûnertiya adil û rasteqîn a Kurdan bê kirin û bêyî beşdariya tevahî pêkhateyên di siberoja Sûriyeyê de Sûriye aram nabe.
