Rayedarên Vîetnamê roja Îniyê daxuyanî dan û diyar kir in ku bager li welêt bû sedema mirina herî kêm 5 kesan.
Bagerên tund û pêlên bahozê ku di saetê de digihije 149 km lezê, car din li herêmên ku ev hefteyeke bi lehî û baranên tund re rû bi rû ye, xist.
Qadên Mîrateya Cîhanê ya UNESCO jî di nav de, gelek herêm di bin avê de man bi dehan mal zirar dîtin yan jî bi temamî hilweşiyan.
Di dîmenên li herêma Hoài Nhon hatine kişandin de, hat dîtin ku pêlan mal û kolan bi temamî dorpêç kirine.
Li gorî medyaya herêmî niştecihên eyaleta Gia Lai ti carî bayeke ev qas tund nedîtine û ti tişt nikare xwe li ber bayê bigire.
Ji rayedarên herêmî Pham Anh Tuan jî bager weke “xwedî mezinahiyeke bêhempa û hêza hilweşîner” pênase kir. Rayedaran diyar kir ku li herêmê zêdeyî 7.000 kes tehliyeyî qadên biewle hatine kirin.
Hişyarî hate dayîn ku di rojên pêş de jî wê baranên tund dewam bikin.
LI FÎLÎPÎNAN HERÎ KÊM 188 KES MIRIN
Kalmaegi beriya Vîetnamê di rojên dawî de li navenda Fîlîpînan, bi taybetî li eyaleta Cebu ya xwedî nifûsa zêde bû sedema lehiyên tund. Li seranserî welêt herî kêm 188 kesan jiyana xwe ji dest dan, 135 kes jî hîna winda ne.
Li Vîetnamê beriya bagera Kalmaegi, karesatên xwezayî îsal bû sedema windabûn yan jî mirina 279 kesan û li gorî ofîsa îstatîstîka neteweyî ya welêt zêdeyî 2 milyon dolar zirar çêbû.
