Şaredariya Bajarê Mezin a Amed dê bi dirûşmeya “Ber bi Bajarên Jinan ve” hevdîtinek lidar bixe. Şaredarî bi gelek rêxistinên civakên sivîl û rêxistinên jinan ên li bajêr re hevdîtin kir. Di vê çarçoveyê de Amed jî di nav de ji bo ku li 4 bajaran ‘Bajarên Jinan’ ragihînin dê dest bi xebatên xwe bikin. Jinên ku dê piştî hevdîtinan dest bi xebatan bikin, dê li Amed, Nisêbîn, Gever, Cizîr û Edremîtê li qadan bin. Civîna ewil a projeyê jî dê di 8’ê Mijdarê de were lidar xistin.
Seroka Daîreya Polîtîkayên Jinan a Şaredariya Bajarê Mezin a Amedê Ozden Gurbuz, diyar kir ku armanca vê projeyê xurtkirina tevlîbûna jinan di jiyana civakî de û avakirina bajarên gihiştbar û ewle ne. Ozden Gurbuz, anî ziman ku ev xebat xwe dispêre hafizeyek raboriyê û got, “Em bi saya keda jinan bajarên wekhev, azad û ji bo her kesî gihiştbar ava dikin. Hêza me ya kirinê heye. Bajarek jinan a rastîn dê çawa be, em ji jinan pirs dikin, hîn dibin û li gorî wê dê diyar bikin.”
Xebatên avakirina “Bajarê Jinan” ku berê ji aliyê rêveberiyên herêmî ve hatibûn destpêkirin, li gelek bajaran ji ber tayînkirina qeyûman nîvco man. Ozden Gurbuz, diyar kir ku ev fikir ji nû ve ketiye rojevê û got ku ew dixwazin li ser bingeha ezmûnên 2011-2014 modelek bihêztir ava bikin.
‘DIVÊ EM BAJARAN BI PERSPEKTÎFA JINAN JI NÛ VE DIZAYN BIKIN’
Ozden Gurbuz, da xuyakirin ku bajar ji hêla zihniyetek serdest a mêran ve hatine teşekirin û got ku ji ber vê jin ji qadên giştî têne dûrxistin. Ozden Gurbuz got, “Xizanbûn û krîz vê zextê zêde dikin. Divê em bajaran bi perspektîfa jinan ji nû ve dizyan bikin. Divê dizyaneke ku gihiştbar û ewlehiya jinan ji binesaziyê heta jiyana civakî di her alî de li ber çavan bigire, pêk were.”
‘TEVAHÎ DÎNAMÎKÊN LI BAJÊR DÊ TEVLÎ VÊ PÊVAJOYÊ BIBIN’
Ozden Gurbuz, destnîşan kir ku ev xebat ne tenê hewldanek hevkariyê ya saziyên jinan e, ya tevahiya bajêr e û wiha domand, “Bajarê Jinan armanc dike ku bajarekî gihîştî bi perspektîfek wekhev a zayendî, ekolojîk û azadîxwaz biafirîne. Komele, partiyên siyasî, odeyên pîşeyî, rêxistinên jinan û nûnerên jîngehê jî tevlî vê pêvajoyê dibin.”
‘ARMANCA SEREKE BAJARÊN GIHIŞTBAR Û EWLE NE’
Ozden Gurbuz, da zanîn ku di vê projeyê de armanca sereke bajarên gihiştbar û ewle ne û wiha dewam kir, “Bajarê Jinan tê wateya ne tenê ji bo jinan, di heman demê de ji bo zarokan, kal û pîran, astengdar û komên dezavantaj jî avakirina bajarekî ewle ye.” Ozden Gurbuz, hemû jin vexwend civîna 8’ê Mijdarê û got, “Nêrîn û pêşniyarên we ji bo me pir bi qîmet in.”
‘EV XEBAT DÊ BI TEVKARIYA JINAN MEZIN BIBE’
Ozden Gurbuz, diyar kir ku Bajarê Jinan ne tenê polîtîkayeke jinan e, xebatek e ku her qadê, ji binesaziyê heta çand û hunerê, ji tenduristiyê heta ekolojiyê, di nava xwe de vedihewîne. Ozden Gurbuz got, “Bajarê Jinan îfadeya nêzîkatiyek e ku xuyabûnê zêde dike û jinan li Amedê xurtir dike.”
