Ji bo şehîdên doza Azadiya Kurdistanê yên di van rojên dawî de li Amed, Wan, Mêrdîn, Cizîr û Geverê ku di dem û cihên cuda de şehîd bûbûn û di nava vê hefteyê de wek komî hatin ragihandin, li Wargeha Penaberan a Şehîd Rustem Cûdî (Mexmûr) serdanên sersaxiyê tên qebûl kirin.
Serdanên sersaxiyê li Komîteya Malbatên Şehîdan a Mexmûrê ji aliyê Meclîsa Gel a Mexmûrê û xizmên Şehîd Amara Umud Zinar, Şehîd Partîzan Serxwebûn, Şiyar Çelê, Evîndar Kurdistan, Xebat Gever û Hişyar Zagroz yên li wargehê jiyan dikin ve tên qebûlkirin.
Beriya ku serdana sersaxiyê destpê bike ji bo tevahî şehîdên doza rizgariya gelê Kurd deqeyek rêz hat girtin. Piştî rêzgirtinê Hevberdevkê Saziya Malbatên Şehîdan ê Mexmûrê Qedrî Şirîşeyî axivî.
Qedrî Şirîşeyî di kesayeta her 6 şehîdan de hemû Şehîdên Doza Azadiya Kurdistanê bi bîr anîn û wiha got: “Em ji wek xelkê wargehê parçeyek ji gelê Kurd û têkoşerên vê şoreşê ne. Me gelek caran li vê mekanê pîroz şahidî ji rewşê wiha re kiriye. Me gelek leheng û qehremanên xwe oxir kirine. Li ser vê bingehê jî îşev em sersaxiya her 6 lehengên xwe li vir datînin. Em soz didin şehîdên xwe em ê heta dawiyê şopdarên rê û xeta wan bin.”
Her wiha endamên saziyên wargehê û xelkê wargehê bi girseyî serdan Komîteya Malbatên Şehîdan a Mexmûrê dikin.
Di serdana sersaxiyê de çalakvana çalakiya Nobetê Fadîle Tok jî destnîşan kir ku têkoşîna şehîdên azadiya Kurdistanê ew gihandin asta serkeftinê û wiha pêde çû: “Em bejna xwe li hemberî lehengî, ked û têkoşîna wan di tewînin. Em heta dawiya jiyanê xwe minetdarê şehîdan bin, ji ber ku wan em anîn vê rojê. Her şehîdek felsefeya jiyana me û ronahiya rêya me ye. Em li pey şopa wan dimeşîn. Bi saya keda van şehîdan xeyalên wan bi fermî tên qebûlkirin.”
Wê heta derengiya şevê serdanên sersaxiyê werin qebûlkirin.
