Êrîşên faşîst ên ku demên dawî li zanîngehan zêde bûne, her ku diçe dijwartir dibin. Herî dawî bi êrişên li ODTU’yê û piştî wê bi hedefgirtina xwendekarên şoreşger re, hewl tê dayîn ku qadên jiyanê yên ciwanên şoreşger ên li zanîngehan bên tengkirin.
Di konsera Îlkay Akkaya ya li Stadyuma Devrîm a ODTU’yê de êrîşeke faşîst pêk hat û piştî ku xwendekarên şoreşger hatin hedefgirtin, 2 xwendekar hatin girtin. Xwendekarên hatin desteser kirin rastî êşkenceyê hatin û li ser medyaya dîjîtal ji aliyê faşîstan ve hatin hedefgirtin. Hin xwendekaran gefên kuştinê xwarin.
Me derbarê êrîşên li zanîngehan de bi Eda Koçak a ji Komunê û xwendekarekî ODTU’yê re axivî. Em ji ber sedemên ewlehiyê navê xwendekarê ODTU’yê yê ku hîn jî gefan dixwe, nadin.
LI ODTU’YÊ JI BO PROVOKASYONÊ AL BI KAR ANÎN
E.F. yê ku di dema êrişên li ODTU’yê de li wir bû û bûyer dîtin, wiha got: “Îdîaya êrîşa li ser alê bi temamî nerast e. Berevajî vê, koma ku ji bo provokasyonê hatibû, xwest alê bi kar bîne û ji bo medyayê dîmenan bide. Bi rojan bû ku propagandayeke wan a amadekirî hebû; dema Îlkay Akkaya derket ser dikê, tîmeke ku nîvê wan ne ODTU’yî bûn di bin ala mezin de dest bi hirhoyî kirin. Di strana heftemîn de, hevalên me li hemberî heqaret û hirhoyîkirinê nekarîn xwe ragirin û mudaxale kirin. Dema mudaxale dest pê kir, koma ku xwe li pişt ala Tirkiyeyê veşart, di rojên pişt re jî dîmen bi vî awayî belav kirin. Ev şerekî ku ji aliyê komên Ulkucu ve hatibû destpêkirin bû û li dijî xwendekarên ODTU’yê yên ku bi hejmar zêde bûn, hat bikaranîn. Par dema Nur Surer hatibû jî hewl dabûn vê bikin lê bi ser neketibûn. Roja duyemîn a şahiyê jî bi alayên Gokturk û nîşana ‘Bozkurt’ê êrişî hevalên me yên UGT’yê kirin, heqaret li me kirin û mudaxaleya fîzîkî li hevalên me yên ku bi wan re nîqaş dikirin, kirin.”
NAXWAZIN LI DIBISTANAN QADÊN XWENDEKARÊN ÇEPGIR HEBIN
E.F. anî ziman ku bingeha van êrîşên li ser ODTU’yê bilindkirina avhewaya tirsê ye û wiha got: “Me ev tişt li ODTU’yê zêde nedidît, lê ji ber ku em li cem hevalên xwe yên li zanîngehên din bûn, me êrişên faşîst didîtin û tecrube dikirin. Helbet armanca wan ew e ku avhewaya tirsê û rastgiriyê bilind bikin û tevgera xwendekaran qels bikin. Naxwazin zanîngeh bibin qadên ku xwendekarên çepgir bi rehetî lê hebin û xwe birêxistin bikin.
Yek ji aliyên ku herî zêde pê dilteng dibin ew e ku ODTU berevajî zanîngehên din hîn jî wekî ‘qadeke rizgarkirî’ tevdigere û kevneşopiyên me yên wekî ‘Meşa Şoreşê’ hîn jî berdewam dikin. Çi dibe bila bibe, her çend demografiya dibistanê biguhere û rastgirî li her derê zêde bibe jî, pratîk û kevneşopiya şoreşgerî kontrolê winda nake û hewaya ‘ODTU ya Şoreşger’ tê parastin. Ev tiştê ku komên Ulkucu herî kêm tehamul dikin e.”
PÊŞEYA ME EW E KU EM DIBISTANÊ JI BO XWENDEKARAN EWLE BIKIN
E.F. diyar kir ku xwendekar li dijî êrişan civînan li dar dixin û pêvajoyê dinirxînin û wiha got: “Wekî pêkhateyên dibistanê, em civînên li ser bingeha rexne û xwerexnekirinê li dar dixin da ku bibînin ka em ê çawa yekîtiyê ji nû ve ava bikin. Em hewl didin pêvajoyê bi vî awayî bimeşînin ku kêm hevalên me bên fîşkirin, girtin û zirarê bibînin. Pêşeya me ya yekem ew e ku em dibistanê ji bo xwendekarên çepgir, jin û LGBTI+’yan ji nû ve bikin qadeke ewle. Parastina paşeroja ODTU ya Şoreşger a ku ji me re maye, erka me ya herî mezin e.”
LI DIBISTANAN TÊKOŞÎNA SOSYALÎST TÊ HEDEFGIRTIN
Eda Koçak diyar kir ku şêweyên êrişên faşîst ên li zanîngehan guherîne û lez girtine û wiha berdewam kir:” Bi taybetî dema xwendekarên sosyalîst li zanîngehan çalak in, êrişên faşîst pêk dihatin. Lê di demên dawî de li zanîngehên mîna DTCF, Hacettepe, Stenbol, Ege û Dokuz Eylulê ku faşîst lê birêxistin bûne; di çalakiyên ku xwendekar daxwazên xwe yên kampusê an jî giliyên xwe yên li ser rektorên qeyûm tînin ziman, bi şûr, kêr û palayan êriş dikin. Tenê hefteyek berê li ODTU’yê, me pêvajoyek dît ku tê de ne tenê xwendekar, lê rasterast têkoşîna sosyalîst hat hedefgirtin.
2 hevalên me yên şoreşger ji ber ku van êrişên faşîst pûç kirin, hatin girtin. Piştî 19’ê Adarê têkoşîna ciwanan bêtir xuya bû û girseyên xwendekaran ên serbixwe dest bi rêxistinbûnê kirin. Gelek ciwan di vê demê de rasterast bi dewletê re rû bi rû man û tundiya polîsan dîtin. Di vê pêvajoyê de slogana têkoşîna şoreşger û sosyalîst û şêweyên rêxistinbûnê yên ku bi salan e nayên bihîstin, hatin pêşxistin. Ev destkeftî ji bo têkoşîna sosyalîst wekî pozîtîf hatin qeydkirin.
RÊXISTINÊN FAŞÎST ÊN KU CIWANAN DIKIN BINGEHA XWE HENE
Koçak di berdewamiya axaftina xwe de got: “Li hemberî îhtîmala komkirina komên şoreşger-sosyalîst ên belavbûyî, komên faşîst jî bi telîmatên navendên partiyan û navendên faşîst dest bi tevgera birêxistinkirî kirine. Em vê di nava salekê de dibînin. Em bi pêkhateyên nû yên faşîst re rû bi rû ne. Navê koma bi navê ‘Tevgera Jinên Îstîklalê’ ku provokasyona li ODTU’yê organîze kir, ne tesaduf e. Partiya Zaferê ku wekî muxalifê desthilata AKP-MHP’ê xuya dike, lê di rastiyê de bermayiyê wan e, bûye plankerê vê pêkhateya nû ya faşîst. Sedema ku ew dixwazin di gelek qadên têkoşînê de derkevin pêş, ew e ku têkoşîna sosyalîst û şoreşgeran di pêvajoyeke hêz-komkirinê de ye.”
LI ZANÎNGEHAN NASNAMEYEKE APOLÎTÎK AVA DIKIN
Koçak diyar kir ku yên êrişan dikin çeteyên faşîst in û wiha dirêjî da axaftina xwe: “Hêza van çeteyên faşîst nîn e ku li hemberî parastina xwendekarên sosyalîst bisekinin. Yên ku xwendekar in jî li dibistanan wekî komên marjînal in, lê qadên burokrasî yên ku dewletê ji wan re vekiriye bikar tînin. Bi propagandaya provokatif dixwazin di nav xwendekaran de têgihiştineke muxalif ava bikin. Nasnameya xwendekariyê wekî nasnameyeke apolîtîk saz dikin.
Her çend piraniya xwendekaran ji van çeteyan û pratîkên wan aciz bin jî, beşek ji vê siyaseta manîpulekirî bandor dibe. Lê belê divê hêza birêxistinkirî ya xwendekaran bersiva pêwîst bide û serdestiya xwe ya îdeolojîk û fîzîkî ava bike. Em jî di qadên ku lê ne de, vê birêxistin dikin.”
