Meclîsa Jinan a Partiya Wekhevî û Demokrasiyê ya Gelan (DEM Partî), li Edeneyê civîna Meclîsa Jinan a Herêma Çûkûrovayê lidar xist.
Beriya civînê Berdevka Meclîsa Jinan Halîde Turkoglû axivî û got, ew ê rêyên mezinkirina têkoşîna jinê û Pêvajoya Aştî û Civaka Demokratîk nîqaş bikin.
Halîde Turkoglû bal kişand ser bandora şerên li Rojhilata Navîn li ser jinê û diyar kir ku li Îran û Efganistanê jin li dijî rejîmên zextkar li ber xwe didin.
Halîde Turkoglû ragihand ku girtîgehên Îranê ji bo jinan û muxalîfan veguherîne “êşkencexaneyan” û polîtîkayên Talîbanê yên li Efganistanê li hemberî jinê pêk tîne, rexne kir.
Halîde Turkoglû anî ziman ku “Banga Aştî û Civaka Demokratîk” a ji aliyê Rêber Apo ve hatî kirin, ji bo çareseriya demokratîk a pirsgirêka Kurd girîng e û got, ji bo ev pêvajo pêş bikeve, divê Rêber Apo bikare di şert û mercên azad de bixebite.
Halîde Turkoglû destnîşan kir ku ew ê destûr nedin jiyana jinan hepsî sîstema desthilatdariya mêr were kirin.
Halîde Turkoglû bang kir ku girtiyên nexweş û siyasî bên berdan û got, “Berdana Nedîme Yaklav a li Girtîgeha Jinan a Sîncanê ku 34 sal in girtî ye, cara 7’an hate taloqkirin.”
Halîde Turkoglû destnîşan kir ku navê zemînê têkoşîna wan a hevpar, aştî ye û ji bo meşên “Ji bo aştiyê gav bavêje” ku wê 16’ê Gulanê li gelek bajaran were lidarxistin, banga tevlîbûnê kir.
