Serokê Herêma Kurdistanê Nêçirvan Barzanî di çarçoveya Forûma Dîplomasiyê ya Antalyayê ya 5’emîn de bi Nûnerê Dewletên Yekbûyî yên Emerîkayê (DYE) yê ji bo Sûriyeyê û Sefîrê Bilind ê Tirkiyeyê Tom Barrack re hevdîtinek pêk anî.
Barzanî piştî hevdîtinê daxuyaniyek da û diyar kir ku hevdîtin “berhemdar” derbas bû û wan têkiliyên navbera DYE, Iraq û Herêma Kurdistanê bi berfirehî nirxandin. Di hevdîtinê de her wiha li ser bûyerên dawî yên li herêmê nêrîn hatin parvekirin.
Li gorî daxuyaniya Serokatiya Herêma Kurdistanê, yek ji sernavên herî girîng ên hevdîtinê rewşa li Sûriyeyê û paşeroja Kurdan a li vî welatî bû. aliyan bûyerên giştî yên li Rojhilata Navîn û şerê ku bandorê li ewlehiya herêmî dike, nirxandin.
Di hevdîtinê de işaret bi bandora rageşiya navbera DYE û Îranê ya li ser Iraqê û Herêma Kurdistanê hate kirin. Aliyan destnîşan kirin ku ji bo aştiya li herêmê û parastina aramiyê divê koordînasyon û hevkarî bê kirin.
Di vê navberê de Serokatiya Herêma Kurdistanê ragihand ku Nêçirvan Barzanî wê di çarçoveya forûmê de bi lîderên cîhanê û rayedarên payebilind re hevdîtinan bike.
