Komîserê Bilind ê Mafên Mirovan ê Neteweyên Yekbûyî (NY) Vollker Turk anî ziman ku zextên dewleta Îranê giran bûne. Turk 29’ê Nîsana 2026’an daxuyaniyek da û anî ziman ku mehên dawî darvekirin, binçavkirinên girseyî, mercên giran ên li girtîgehan, desteserkirina mal û milkan û qutbûna demdirêj a înternetê krîza mafên mirovoan a li Îranê girantir kiriye.
Turk bang li meqamên Îranê kir ku darvekirinan tavilê bisekinîne, cezayê mirinê rawestîne, mafê darizandina adîl misoger bike û kesên bi kêfî hatine girtin berde.
Li gorî NY’yê di nava du mehên dawî de ku êrişên Îsraîl û DYE’yê yên li ser Îranê destpê kirin herî kêm 21 kes hatin darvekirin. Ji wan 9 kes bi hinceta tevlî protestoyên Çilaya 2026’an bûne, 10 jê bi îdîaya endametiya rêxistinên muxalîf û 2 jî bi sûcdariya sîxurihê hatin darvekirin.
Di daxuyaniya NY’ê de hate ragihandin ku pênaseya ‘sûcê ewlekariya neteweyî’ li Îranê gelekî berfireh û xumamî ye û hate gotin, ji ber vê yekê zarok jî di nav de gelek kes bi gefa cezayê darvekirinê re rû bi rû ne.
Li gorî daneyên Neteweyên Yekbûyî ji 28’ê Sibatê û vir ve li Îranê zêdeyî 4 hezar kes bi sûcdariya têkildarî ewlekariya neteweyî hatin binçavkirin. Neteweyên Yekbûyî diyar kir ku beşek ji van kesan bi zorê hatin windakirin, êşkence li wan hate kirin an jî li kiryarên derveyî mirovahiyê rast hatin.
Neteweyên Yekbûyî ragihand ku ev zext herî zêde li Bahaiyan, Zerduştiyan, Kurdan û Belûcan hate kirin.
