Di rûniştina 2’yemîn a civîna 14’em a Komîsyona Hevgirtina Neteweyî, Xwişk-Biratî û Demokrasiyê de Komeleya Piştgirî û Yekitiyê ya ji bo Kesên Xizm û Nasên xwe li Dergûşa Şaristaniyê Windakirinê re (MEBYA-DER), Komeleya Yekitî û Demokrasiyê (DEMBÎRDER), Komeleya Xebatên Demokrasî û Polîtikayê (PODEM), Komeleya Însiyatîfa Mafan, Komeleya Aştiyê, Komeleya Lihevkirina Civakî (TMD) hatin guhdarkirin.
Di civînê de ewilî ji MEBYA-DERê Ramazan Dengîz axivî. Ramazan Dengîz qala êrişên li dijî cenazeyên gerîlayên kir û wiha got: “Dema malbat cenazeyên zarokên xwe digirin jî ambulans û wesayitê nadin wan. Goristan hatin bombebarankirin. Cenaze li pişt wesayîtan giredan. Cenaze di hûndirê qutiyê de radestî malbatan hat kirin. Gelek caran destûr nedan ku malbat cenazeyên xwe bispêrin axê. Êrişî şînê kirin. Gelek caran ji aliyê malbatan ve ji me re serîledan hatinê ku malbat li pêy cenazeyên zarokên xwe ne, li pêy hestiyên zarokên xwe ne. Wê rojê dayikek jî serî li komeleya me da. Dayika ku li pêy hestiyên zarokê xwe ye, hûn dikarin ji vê dayikê re çi bejin?”
Ramazan Dengîz di berdewama axaftina xwe de diyar kir ku ji bo goristanên bêkesan hewcehî bi komîsyonekê heye û ev daxwaz kirin: “Bi sedan gor hene. Ji ber vê yekê em daxwaza avakirina bankeke DNA ya hevbeş ji bo malbatan dikin. Malbatên me yên kal û pîr zarokên xwe winda kirine û li ser vê yekê, ji bo tazmînatê bi milyaran lîreyan doz li wan tê vekirin. Malbatên me tên cem me û dipirsin em çi dikarin bikin. Divê ev doz werin betalkirin. Divê statuya qanûna goristanê bidin goristanan. Li herêma me gelek goristan hene. Divê ev statu ji wan re were dayîn. Di komeleya me de kes tune ku lêpirsîn lê nehatiye vekirin, yan ceza li wan nehatiye birîn. Em daxwaz dikin ku ev doz tavilê werin betalkirin. Em piştgiriya pêvajoya Aştî û Civaka Demokratîk dikin.”
Piştre jî Hevseroka MEBYA-DER’ê ya Şaxa Êlihê Nezahat Toprak Hasan axivî. Nezahat Toprak Hasan qala êrîş û pêkanînên li dijî cenazeyên gerîlayên PKK’ê kir û komîsyon vexwend bajarên Bakurê Kurdistanê. Nezahat Toprak Hasan destnîşan kir ku weke malbat di serî de daxwaza wan ew e ku komîsyon bi Rêber Apo re hevdîtinê bike û wiha dirêjî da axaftina xwe: “Em bi hemû hestên xwe yên dilsoz ên ji bo aştiyê we vedixwînin bajarên xwe ku hûn guhdarî bikin, lêkolîn bikin. Bêyî ku hûn vê qîrînê bibihîzin, bêyî ku vê qîrînê bigirîn, ez bawer nakim ku em li vir bigihîjin encamekê. Divê birêz Abdullah Ocalan weke muxatabê serekê yê pêvajoyê were dîtin. Her wiha divê di bin banê vê komîsyonê de komîsyoneke lêkolîna heqîqetan were avakirin. Em silavên ewe ji mîmarê vê pêvajoyê, yê ku ji rêxistinê çek da berdan û ew komîsyon da ava kirin ji Birêz Abdullah Ocalan re dişînin.”
