Partiya Demokrasî û Wekheviyê ya Gelan (DEM Partî), ji bo diyarkirina Berpirsê Îdarî yê Meclîsê li navenda giştî kombûn.
Di civîna ku bi tevlîbûna Hevserokên Giştî ya DEM Partiyê Tulay Hatîmogullari û Tuncer Bakirhan pêk hat de, parlamenterên partiyê hem rojeva siyasî û hem jî mijarên girîng ên di çarçoveya xebatên meclîsê de nîqaş kirin.
Di civînê de mijarên wekî, azadiya fizîkî ya Rêber Apo, qanûnên ku di çarçoveya pêvajoya Aştî û Civaka Demokratîk de li meclîsê bên destgirtin û geşedanên li Rojhilata Navînê hatin nîqaşkirin. Her wiha di civînê de krîza aborî û xîzaniya li Tirkiyeyê û xebatên ji bo 1’ê Gulanê Cejna Karker û Kedkaran a Cîhanê jî hat nîqaşkirin.
Her wiha parlamenteran li ser aloziya di navbera DYE û Îsraîl û Îranê de, pêşketinên li Rojhilata Navîn û rewşa siyasî ya herêmê nêrînên xwe parvekirin.
Piştî nirxandina rojevê ji bo hilbijartina Berpirsê Îdarî yê Meclîsê sindoq hat danîn û parlamenteran deng da.
Parlamenterê Mêrdînê George Aslan, Parlamentera Colemêrgê Oznur Bartin, Parlamentera Wanê Gulderen Varli, Parlamenterê Bedlîse Huseyîn Olan û Parlmaneterê Çewligê Omer Farûk Hulakû bûn namzet.
Di encama dengdayinê de Parlamenterê DEM Partî yê Çewligê Omer Farûk Hulakû bû Berpirsê Îdarî yê Meclîsê.
