Di demekê de ku li Rojhilata Navîn hevsengiyên siyasî jinûve ava dibin, li herêmên Kurdan jî bûyerên girîng diqewimin. Parlamenterê berê yê Iraqê û siyasetmedarê Kurd Mûhsîn Osman mijar nirxand.
‘LI ROJAVA DIVÊ ISRAR LI SER PERWERDEYA KURDÎ BÊ KIRIN’
Osman anî ziman ku li Rojava bi salan li qada perwerde û ziman têkoşîneke girîng hate meşandin û perwerdeya bi Kurdî weke yek ji destketiyên girîng ê vê têkoşînê pênase kir. Mûhsîn Osman diyar kir ku mercên siyasî yên heyî têkoşîneke nû ferz dike û goot, “Destketiyek hatiye afirandin, lê belê divê ev destketî bê mayindekirin.” Osman got, naskirina Kurdî weke ‘zimanê neteweyî’ li Sûriyeyê girîng e, ê belê bi tena serê xwe têrê nake, divê Kurdî weke zimanê fermî bê qebûlkirin.
Mûhsîn Osman destnîşan kir ku ev têkoşîn divê êdî ne tenê li qada perwerdeyê, her wiha li nava avaniya siyasî û hiqûqî ya Sûriyeya nû dewam bike û anî ziman ku ji bo vê jî pêwîstî bi rêbazên dîplomatîk û siyasî heye ku li gorî mercên nû guncaw bin.
HIŞYARIYA LI HEMBERÎ PROVOKASYONAN
Siyasetmedar Mûhsîn Osman ragihand ku bûyerên li Rojava û pêvajoya siyasî ya li Tirkiyeyê bandorê li hev dikin û diyar kir ku Kurd divê di dema nû de li hemberî provokasyonan baldar bin, careke din ber bi pêvajoyeke şer ve neyên kişandin. Osman got, “Têkoşîna dema nû divê siyasî û dîplomatîk be.”
Di dewama axaftina xwe de bi bîr xist ku Kurdan berê bi Emerîka, Yekîtiya Sowyetan, Fransa, Tirkiye û hêzên din ên herêmî re di demên cuda de têkilî danîn û anî ziman ku polîtîkayên dewletan li gorî şert û mercan dikarin biguherin, lewma Kurd jî divê polîtîkayên xwe li gorî helwesta hêzên cuda diyar neke.
Osman got, “Divê baş bê zanîn bê kî dost e, kî dijmin e” û diyar kir ku diyalog û muzakere jî parçeyekî têkoşînê ye. Mûhsîn Osman ragihand ku divê Kurd rêyên siyasî û dîplomatîk bi xurtî bi kar bînin û li gorî mercên dema nû têkoşînê bimeşînin.
‘GIRÎNG E KURD BI HEV RE TEVBIGERIN’
Mûhsîn Osman destnîşan kir ku divê têkilî û piştevaniya navbera Kurdan bê xurtkirin û got, “Em hevkariyê dixwazin, em mafên xwe dixwazin.” Osman ragihand ku ji bo parastina destketiyan û bidestxistina mafên nû girîng e ku Kurd bi hev re tevbigerin.
‘EWLEKARIYA ŞENGALÊ Û ÎRADEYA GEL DIVÊ ESAS BÊ GIRTIN’
Osman bi dewamî anî ziman ku paşeroja Şengalê nabe ku tenê di bin sernavên leşkerî û ewlekariyê de bê nirxandin û işaret bi rewşa stratejîk a herêmê kir. Osman diyar kir ku Şengal li gel girîngiya xwe ya ji bo Kurdan ji bo Îsraîl, Dewletên Yekbûyî yên Emerîka û hêzên din ên herêmê jî girîng tê dîtin.
Mûhsîn Osman anî ziman ku dema Şengal dibe mijar li gel nêzîkatiyên hêzên derve divê rastiya herêmê bi xwe jî esas bê girtin û diyar kir ku divê îradeya gelê Şengalê diyarker be. Mûhsîn Osman got, divê ewlekariya herêmê, parastina gel, maf û îradeya siyasî ya gel bi hev re bê nirxandin û got, avaniya siyasî ya Iraqê jî ji vê nirxandinê cuda nikare bê dîtin.
