Endama Şandeya Îmraliyê ya DEM Partiyê Pervîn Buldan, li Wanê serdana Dayikên Aştiyê kir. Serdan li avahiya DEM Partiyê pêk hat û parlamenterên DEM Partiyê yên Wanê û nûnerên saziyên sivîl tev li serdanê bûn.
Di serdanê de ewilî Hevseroka DEM Partiyê ya Wanê Gulşen Kurt axivî û bal kişand ser girîngiya pêvajoyê û pirsgirêka Kurd. Gulşen Kurt wiha got: “Ev pêvajo encama salan e ku li hemberî zilm, zordarî û polîtîkayên şer gelê Kurd berxwedaneke mezin dimeşîne. Ev têkoşîn berî her tiştî hemû qad û her çar parçeyên Kurdistanê di nav xwe de digire. Di nav vê berxwedanê de jî pêşengiya herî mezin jin û Dayikên Aştiyê dikin.”
‘DI REFÊN HERÎ PÊŞ ÊN TÊKOŞÎNÊ DE DAYIK HENE’
Piştî Gulşen Kurt, Endama Şandeya Îmraliyê Pervîn Buldan anî ziman ku di hevdîtina xwe ya dawî de Rêberê Gelê Kurd Abdullah Ocalan silav li Dayikên Aştiyê kiriye û wiha pê de çû: “Berî her tiştî ez silavên Rêberê Gelê Kurd Abdullah Ocalan ku di hevdîtina dawî ya 13’yê Îlonê de gihandibû me, ji hemû dayikan re tînim. Têkoşîna aştiyê têkoşîneke zehmet e û di refên herî pêş ên vê têkoşînê de dayik û jin hene. Ji ber ku mexdûrên herî mezin ên şer ew in ku zarokên xwe dane axê.”
‘DAXWAZA ME EW E KU HIQÛQA KURD BÊ QEBÛLKIRIN’
Pervîn Buldan di berdewamiya axaftina xwe de ev yek anî ziman: “Heke em îro aşitiyê dixwazin, ji bo ku kezeba tu dayikeke din neşewite, tu zarok jiyana xwe ji dest nede û nekeve bin axê em dixwazin. Ev erd û ev erdnîgarî rastî êşên gelekî mezin hat. Tu malbat nema ku berdêl nedabe; an zarokê wan çû bin axê, an ket girtîgehê an jî hate surgûnkirin. Êdî piştî vê demê daxwaza me ew e ku berdêl neyên dayîn û maf û hiqûqa gelê Kurd bê nasîn. Daxwaza me ne aştiyeke ji rêzê ye, em aştiyeke birûmet diparêzin.”
‘EM Ê TÊKEVIN PÊVAJOYA GAVÊN ŞÊNBER’
Pervîn Buldan di dawiya axaftina xwe de destnîşan kir ku baweriya wan bi rola dayikan heye û got: “Di vê têkoşînê de dîsa berpirsiyarî û erka herî mezin dikeve ser milê dayikên me. Em dizanin û jê bawer dikin ku dayikên me di vê pêvajoya aştiyê de jî, mîna berê, dê bibin hêza pêşeng a vê berxwedan û tevgerê. Di rojên pêş de em ê têkevin pêvajoyek ku gavên şênber û pratîk dê bên avêtin. Dê geşedanên girîng rû bidin. Bi van gavan ve aştî dê şênbertir bibe.”
