Partiya Îslamiya Kurdistanê bi boneya salvegera destpêka Komkujiya Dêrsimê daxuyaniyeke nivîskî weşand û got: ‘’Di 4’ê Gulana 1937’an de, bi biryara Encûmena Wezîran ji aliyê zihniyeta Kemalist ve li Dêrsimê dest bi qetlîamekê hate kirin. Di vê komkujiyê de bêyî cudahiya zarok, jin, kal û pîran li hemberî gelê Dêrsimê hovîtî û jenosîdek hate kirin.’’
Dewama daxuyaniya PÎK’ê bi vî rengî ye:
‘’Li gundan mirov bi komî û bi awayekî zindî avêtin nav agir û hatin şewitandin, gund hatin bombekirin, û bi hezaran mirov hatin kuştin. Kesên ku man jî, bi zorê hatin sirgûnkirin û zarokên Dêrsimê ji malbatên wan hatin qutkirin, bi darê zorê hatin Tirk-Sunnîkirin. Ev zihniyeta ku ev kiryarên tirsnak pêk anîn, got: ‘Ji bo parastina welat, me serhildan tepisand.’
Îro jî dewleta Tirk ne tenê di sînorên Tirkiyeyê de, li her perçeyên Kurdistanê û li her deverên cîhanê yên ku Kurd lê dijîn, kîn û nefreta xwe ya li dijî gelê Kurd dirijîne û mafê jiyanê ji wan re nas nake.
Dewleta Tirk û dewletên din ên dagirker, hebûn û azadiya gelê Kurd ji bo xwe wekî metirsiyekê dibînin. Ji ber vê yekê, li ser hemû tevgerên siyasî yên Kurd û hemû Kurdan ferz e ku ji bo yekîtiya neteweyî û Kurdistana azad û serbixwe têbikoşin.
Wekî ku Pîr Seyîd Riza li hemberî dijmin bêyî ku çokan bitewîne gotibû: “Min nekarî li hemberî derew û hîleyên we têbikoşim, ev ji min re bû derd, lê belê min jî li ber we çok netewand, ev jî bila ji we re bibe derd.” Nifşên îro jî ji bo azadiya gelê Kurd têkoşîneke birûmet didin meşandin.
Weke Partiya Îslamiya Kurdistanê em Komkujiya Dêrsimê û hemû komkujiyên Kurdistanê hatine kirin, şermezar dikin.’’
