Welatparêzên Efrînê yên li bajarê Qamişloyê, bi wesîleya Cejna Berxwedana Neteweyî salvegera damezrandina PKK’ê ji ajansa me ANF’ê re axivîn. Welatparêzên Efrînê gotin, “PKK’ê rêya ji terîtiyê ber bi ronahiyê ve ye. PKK’ê ji bo nasname, rûmet û hebûnê bû navê têkoşîna gelê Kurd.”
‘PKK’Ê RONAHÎ, GIYAN Û JIYAN E’
Dayika şehîd Elî û Bîrhat Cîlo Şaziye Îbrahîm, diyar kir ku PKK’ê ji bo wan tê wateya ronahî, giyan û jiyanê. Şaziye Îbrahîm, da zanîn ku wan berî dîtina Rêber Apo, dest bi xebata bi PKK’ê re kirine û got ku bi saya PKK’ê wan Kurdbûna xwe nas kirine û haya wan ji hebûna Kurdistanê çêbûye.
Şaziye Îbrahîm anî ziman ku ji sala 1989’an vir ve wan gelek hevalên xwe winda kirine, lê tevî vê yekê jî wan qet ji soza ku dane Rêber, PKK’ê û şehîdan paşve gav neavêtine. Şaziye Îbrahîm, diyar kir ku wan di temenek ciwan de dest bi xebatan kirine û got, “Zarokên me jî wê demê biçûk bûn, lê îro şehîd in. Ji ber vê sozên me her tim nû dibe.”
Şaziye Îbrahîm dibêje ku her çend PKK’ê di warê avaniyê de xwe fesix kiribe jî lê di rastiyê de PKK’ê wê her tim zindî bimîne. Şaziye Îbrahîm, destnîşan kir ku ew ê bibin beşek nûkirina pêvajoya civaka demokratîk û got ku ew sozên xwe yên dane Rêber Apo bi berdewamî nû dikin.
‘PKK’Ê HELWEST Û HIŞMENDIYEK NÛ DI JIYANA GELÊ KURD DE AVA KIR’
Bavê şehîd Dilpak Niyazî Seydo, di axaftina xwe de diyar kirin ku gelê Kurd û hemû civaka Kurd bi derketina PKK’ê re rastiya xwe naskirine û got ku bi pêşengiya Rêber Apo û hevrêyên wî helwest û hişmendiyek nû di jiyana gelê Kurd de hatiye afirandin. Seydo, anî ziman ku bi saya hebûna PKK’ê, dijmin nekarîne gelê Kurd bitepisînin.
Niyazî Seydo, diyar kir ku PKK’ê hemû pirsgirêkên gelê Kurd bi awayekî zanistî û kûr analîz kiriye û kesên di nav tevgerê de cih girtine, di her warî de zana, hişyar û welatparêz bûn. Seydo, da xuyakirin ku ciwanên herî jîr û jêhatî yên Kurdistanê li dora Rêber Apo kom bûne û got ku têkoşîna azadiyê ya heyî bi vê zanînê re mezin bûye.
Seydo, anî ziman ku wan gelek demên zehmet derbas kirine, ji ber êrîşan bi tunebûnê re rû bi rû mane û got ku lê bi saya xeta berxwedanê ya Tevgera Azadiyê ew li ser piyan mane. Seydo di dawiyê de berxwedana li zindana Amedê bibîr xist û got ku bi vê berxwedanê re her kes êdî PKK’ê nas kir û xwedî lê derket.
‘BI SAYA PKK’Ê ME WATEYA AZADIYÊ FÊM KIR’
Hacer Hesen, jî destnîşan kir ku PKK’ê rêyek ji bo mirovahiyê temsîl dike û dibêje ku berî PKK’ê û îdeolojiya Rêber Apo, Kurd jiyanek tarî û paşverû dijiyan. Hacer Hesen, anî ziman ku bi derketina PKK’ê re, Kurdan nasnameyek, hestek mirovahiyê û hestek cîhanê bi dest xistine. Hacer Hesen got, “PKK’ê ne tenê partiyek e, di heman demê de rêberek jiyan, hebûn û azadiyê ye.”
Hacer Hesen, da zanîn ku PKK’ê di nava xwe de cihêrengiyê dihewîne, mirovahiyê dide pêş, exlaq, çand û ramanan dewlemend dike. Hacer Hesen got, “Bi saya PKK’ê, me wateya azadiyê fêm kir.”
‘PKK’Ê GELÊ KURD JI NÛ VE ZINDÎ KIRIYE’
Di dawiyê de, ji Saziya Malbatên Şehîdan Ednan Mihemed axivî û diyar kir ku PKK’ê bi rizgarkirina gelê Kurd ji tunebûnê, gelê Kurd ji nû ve zindî kiriye. Ednan Mihemed, da xuyakirin ku damezrandina PKK’ê di sala 1978’an de qonaxek girîng a dîrokî bû û got, “PKK’ê gelên her çar perçeyên Kurdistanê şiyar kir. Îro Kurd hebûna xwe îspat dikin.”
