Îro şandeya Ewropî ya ku serdana Herêma Bakur û Rojhilatê Sûriyeyê kir, ku ji 12 parlamenterên Ewropî, Brîtanî û endamên rêxistinên civaka sivîl pêk tê, di du civînên cuda de, bi hevserokatiya Meclisa Sûriya Demokratîk (MSD), cîgirên wê û Fermandariya Giştî ya Hêzên Sûriya Demokratîk (QSD) re civiyan.
Aliyên beşdarî civînan bûne, rewşa Sûriyeyê ya giştî ya piştî hilweşîna rejîma Baas’ê, rewşa desthilata heyî ya Şamê, têkiliyên bi Herêma Bakur û Rojhilatê Sûriyeyê re û peymana di navbera desthilata Şamê, hêzên leşkerî û Rêveberiya Xweser de nîqaş kirin.
Her wiha beşdaran behsa êrîşên bênavber ên li ser Herêma Bakur û Rojhilatê Sûriyeyê, êşên gelên herêmê li hember van êrîşan û beşdariya wan a aktîv di pêvajoya siyasî û sazûmaniya saziyên dewletê de, kir.
Şandeya Ewropî ku ji 12 parlamenterên Ewropî, Brîtanî û endamên rêxistinên civaka sivîl pêk tê, 14’ê Nîsanê gihîşt Herêma Bakur û Rojhilatê Sûriyeyê û serdana Daîreya Têkiliyên Derve ya Rêveberiya Xweseriya Demokratîk a bajarê Qamişloyê kir.
Armanca şandeyê ji vê serdanê ew e ku alîkariyên guncaw ên ji bo piştgiriya projeyên aborî yên girêdayî guhertina avhewayê pêşkêş bike û têkiliyên di navbera Rêveberiya Xweseriya Demokratîk û YE’yê de xurt bike.
Yek ji endamên şandeyê diyar kir ku ew hewl didin siyasetên rêveberiyê û çawaniya parastina demokratiya li herêmê digel van tevliheviyên heyî, nas bikin. Her wiha destnîşan kir ku ew girîngiyê didin lêkolînkirina rêbazên hevkariyê di dozên hevbeş de mîna ewlehî, guhertina avhewa û koçberiyê.
Ev serdan, di demekê ku pêwîstiya herêmê bi îstîqrar û hevkariya piştgiriya navneteweyî heye de, pêk tê.
