Şandeya Jinan a Bakur û Rojhilatê Sûriyeyê duh li paytexta Almanyayê Berlînê bi Rêxistina Navneteweyî ya Jinan a ji bo Jinan (Women For Women International) ya têkildarî piştgiriya jinan a li herêmên şer re civiya.
Her du aliyan rewşa jinan a Sûriyeyê û zehmetiyên li pêş rola wan a avakirina Sûriyeyeke demokratîk a nenavendî, xetere û gefên jinên ji tevahî pêkhateyan rûbirûyê dimînin, hewlên dûrxistina wan ji lîstina rola xwe ya pêşengî, nîqaş kirin.
Di hevdîtinê de behsa rola pêşeng a ku jinên li bakur û Rojhilatê Sûriyeyê di pêşxistina projeya Rêveberiya Xweser, xurtkirina hevgirtina civakî û avakirina pergala demokratîk de dilîzin, hat kirin. Li kêlek wê jî her du aliyan girîngî da xebata hevbeş a jinan û pêwîstiya piştgirîdayîna projeyên taybet bi jinan û xurtkirina wan di tevahî aliyan de.
Ev hevdîtin di çarçoveya tûra dîplomasî û Ewropî ya ku Şandeya Jinan a Bakur û Rojhilatê Sûriyeyê ji 6ˊê Îlonê daye destpêkirin de pêk tê. Şandeyê di tûra xwe de bi gelek aliyên hiqûqî û jinan re, bi parlamenterên Fransayê re hevdîtin kirin û tev li semîner û festîvalên çandî û hunerî bû.
Şandeya Jinan a Bakur û Rojhilatê Sûriyeyê ji rêvebera Meclisa Jinan a Bakur û Rojhilatê Sûriyeyê Emîne Omer, berdevka Meclisa Jinan a Sûriyeyê Muna Yûsif, berdevka Kombûna Jinan a Zenûbiya Şehrezad El Casim, endama Koordînasyona Kongra Star Jiyan Hisên û seroka Yekitiya Jinan a Suryan Corcêt Bersûm pêk tê.
