Li Salona Hunerî ya Silêmaniyê ya Başûrê Kurdistanê ji bo bîranîna Şehîdên Taxa Şêxmeqsûd û Eşrefiyê ya Helebê bi tevlîbûna kesûkarên şehîdan û kesayetên siyasî bîranînek heybet hate lidarxistin.
Ewilê di merasîmê de Şanaz Îbrahîm Ehmed axivî û got: “Ciwanên me ji bo pasatina welat û azadî û taxa xwe bûn. Ji bo wê şehîdbûn ji bo me serbilindî ye. Ji vir silavan ji bo wan lehengên berxwedêr yên ser bilind re dinerim ku li Şêxmeqsûd û Eşrefiyê canê xwe kirin qurban ji bo gel û mirovahiyê.”
Şanaz Îbrahîm diyar kir ku divê ew hêviyên xwe nedin dostên xwe ji bo hêviyên mirov nehilweşin û got: “Me li Rojava û Başûr li şûna hemû cîhanê li dijî DAÎŞ’ê şer kir. Niha cîhanê me li hemberî heman hişmendiyê tinê hiştiye û li hemberî Rojava sekiniye. Divê êdî em dersan ji van bûyeran bigirin. Piştgiriya hev bikin, divê baş bizanin dijmin ji ber em Kurdin êrişî me dikin.”
Parêzgerê Silêmaniyê Heval Ebûbekir jî di dewama merasîmê de axivî. Heval Ebûbekir diyar kir ku divê dijmin baş bizane ku nikare Kurdan têk bibe û got: “Çiqasî xwestibe Kurdan tine jî bike, tim Kurdan xwe parastiye. Çok li ber dijmin natewîne. Xak û welatê xwe diparêze. Divê dijmin êdî baş bizane êdî nikarin bi çekê Kurdan tine bikin. Hikûmeta Başûr, Rêveberiya Xwerser ya li Rojava, berxwedana ‘Jin, Jiyan, Azadî’ ya li Rojhilatê Kurdistanê û Pêngava Aştiyê ya li Bakurê Kurdistanê hemû di encama vê têkoşînê de ku şehîdan canê xwe ji bo wê feda kirin, pêk hatiye.”
Îlham Ehmed jî bi rêya dîmenek tevlî merasîmê bû û ev peyam da: “Bi hincetên vala û bê bingeh bi çekên giran, tank û top bi 40 hezar çete ve êrişî Şêxmeqsûd û Eşrefiyê ya Helebê kirin. Ev ne şereke hevseng bû. Şervanên li wir şehîd bûn lehengiyên mezin nîşan da. Xwendina fermî ya zimanê Kurdî ne garantî ye, ji ber ku rejîma berê jî haman tişt gotibû, lê li destûrê nehate bicihkirin.”
Peyama KNK’ê jî ji aliyê Sirwe Osman ve hate xwendin û ev hate gotin: “Heta gelê Kurd bawerî bi van hêzan bîne wê çareseriya pirsa Kurd di bin xeteriyê de be. Eger gelê Kurd ne yek û yekgirtî be wê nikare bigihêje armancên xwe.”
Bi navê Yekîtiya Zanayên Îslamî Mele Eta jî axivî û got: “Ya li Taxa Şêxmeqsûd û Eşrefiyê rû da, tinekirina Kurdan bû. Dijminên gelê Kurd ders ji dîrokê negirtine, ya ku ew dixwazin Kurdan tine bikin, demografiyê biguherînin ew nikarin. Ji her demê bêhtir niha pêwîstiya me bi yekîtiyê û yekrêziyê heye.”
Piştî axaftinan belgefîlmek li ser dîrok, erdnîgarî û berxwedana Şêxmeqsûd û Eşrefiyê hate nîşandan.
Piştre jî li ser navê Pêşmergeyên Dêrîn Cemîl Hewramî jî axivî û ev peyam da: “Ewên kiryarên hol li hemberî gelê Kurd pêk anîn ders ji dîrokê negirtine. Ya ku şervanên Rojava kirin, bûn nimûne serbilindî. Bi taybet berxwedana jinan û serfiraziya wan gelê Kurd serbilind kirin.
Li ser navê Kongra Star jî Necue Elûş diyar kir ku divê êrişa li ser Taxa Şêxmeqsûd û Eşrefiyê weke êrişek ji rêzê bê girtina dest, ew êriş ji bo tinekirin û taybet xelkê sivîl û ciwan kirin hedef.
Herî dawî jî li ser navê Bereya Piştevaniya Bi Rojava Re Bekir Şêx axivî û got: “Pirsa Rojava pirsa gelê me û gelên herêmê ye.”
Di dawiya merasîmê de wêneyê Şehîd Amara û Leyla Qasim ji aliyê Şanaz Îbrahîm Ehemed ve ji bo kesûkarên şehîdan hate dayîn.
