Endamê Heyeta Îmraliyê ya Partiya Demokrasî û Wekheviyê ya Gelan (DEM Partî) Sirri Sureyya Onder ku 15’ê Nîsanê ji ber krîza dil rakirin nexweşxaneyê, hîn jî di rewşeke metirsîdar de ye. Ji bo Onder serdanên ji bo nexweşxaneyê dewam dikin. Gelek peyamên piştevaniyê jî hatin dayin.
DEMÎRTAŞ: DILÊ ME BI TE RE YE
Hevserokê Giştî yê berê yê Partiya Demokratîk a Gelan (HDP) Selahattîn Demîrtaş ji Girtîgeha Edîrneyê ku lê girtî ye peyamek ji bo Onder şand.
Demîrtaş ji bo Onder got, ‘Qasidê aştiyê’ ye û ev peyam da: “Gelekî li ber êrîşên neheq û heqaretan ket, lê belê bi biryardarî li ser rêya aştiyê meşiya. Ji ber vê yekê jî bîranîn, qedir û qîmetê wî gelekî mezin e.
Sirri Beg wê teqez rabe ser piyan, ev aştî wê teqez pêk were û înşallah wê bi serbilindî bi encamên keda xwe serbilind be. Kekê Sirri yê ku herî zêde vê heq dike tu ye; dua û dilê me bi te re ye. Em ji te hez dikin kekê min ê hêja.”
SEROKWEKÎLÊ ŞAREDARIYA BAJARÊ MEZIN A STENBOLÊ SERDAN KIR
Serokwekîlê Şaredariya Bajarê Mezin a Stenbolê Nûrî Aslan serdana wê Nexweşxaneyê kir ku Endamê Heyeta Îmraliyê ya Partiya Demokrasî û Wekheviyê ya Gelan (DEM Partî) û Serokwekîlê Meclîsê Sirri Sureyya Onder lê ye. Aslan ji rayedarên DEM Partiyê û doktoran li ser rewşa tenduristiyê ya Onder agahî wergirt.
Aslan got, “Duayên me ji bo wî ye” û bi vî rengî dewam kir, “Hem derfet û çavkaniyên dewlet û milet, ji bo Serokwekîlê Meclîsê Sirri Beg seferber bûye ku di pozîsyona di ser partiyan re ye. Ev yek jî weke welatiyekî min kêfxweş kir.”
BAHÇELÎ TELEFON KIR
Serokê Giştî yê MHP’ê Devlet Bahçelî têkildarî rewşa tenduristiyê ya Sirri Sureyya Onder hem li doktoran hem jî li Parlamentera Wanê ya DEM Partiyê Pervîn Bûldan geriya. Bahçelî li Pervîn Bûldan geriya, hêviya xwe ya derbasbûnê jê re got û li nexweşxane û doktoran jî geriya û li ser rewşa tenduristiyê ya Onder agahî wergirt.
