Şewata ku li navçeya Hênê ya Amedê dest pê kir, gihîştiye taxên Celik û Fîsê yên Licê. Agirkujên şaredariyên Licê û Amedê hewl didin ku agir vemirînin, ji ber li qadek mezib belav bûye nayê kontrolkirin. Gundiyan piştgiriya hewayî xwestin û rayedaran diyar kirin ku helîkopter niha li şewata li Semsûrê vedimirînin.
HEVŞAREDARA LICÊ: BI DEHAN TAX DI BIN XETEREYA ŞEWATÊ DE NE
Hevşaredara Licê Dîlek Diyar Ozer çû herêma şewatê, diyar kir ku bi dehan tax di nav agir de ne û li ber şewitandinê ne û got, “Ji gelek deveran daxwazên vemirandina agir tên. Tevî ku Şaredariya Bajarê Mezin a Amedê, şaredariyên Hênê, Pasûr, Karaz, Licê û DÎSKÎ piştgirî didin jî têra vemirandina agir nake. Agir tenê bi piştgiriya hewayî dikare were vemirandin. Tevî ku gelek caran daxwaza hewayî me kir jî ne pêkane ku ji hewa mudaxaleyî şewatê bikin. Niha ba heye û vemirandina agir ne pêkan e. Em bang li rayedaran dikin ku piştgiriya vemirandina agir bidin me.”
Dîlan Diyar Ozer anî ziman ku gelek xanî di bin gefa şewatê de ne û got, “Her çend mirov hewl didin jiyana xwe xilas bikin jî, ew nikarin malên xwe biparêzin û neçar dimînin ku wan biterikînin.”
Hevserok careke din banga piştgriya ji bo vemirandina şewatê li rayedaran kir.
EREN: EM PIŞTGIRIYA HEWAYÎ DIXWAZIN
Parlamenterê Partiya Wekhevî û Demokrasiyê ya Gelan (DEM Partî) yê Amedê Serhat Eren jî di parvekirina li ser hesabê xwe yê medyaya dîjîtal de wiha got:
“Agirê ku li Hênê dest pê kir û ber bi taxên Duru û Deşta Fîsê ya Licê ve belav bû. Şewat ji ber ba û giyayê hişk bi lez mezin dibe. Her çiqasî destwerdana bejahî têrê neke jî, welatî daxwaza piştgiriya helîkopterê dikin. Lê hate ragihandin ku helîkopterek agirkujiyê niha ji bo vemirandina agirê li Semsûrê dixebite. Agirkuj li deverên niştecihbûnê bi cih bûne. Em bang li rayedaran dikin ku tavilê piştgiriya hewayî bidin û tedbîran bigirin da ku rê li ber belavbûna karesata li daristan û deverên niştecihbûnê bigirin.”
