Tevgera Jinên Kurd li Ewropayê (TJK-E), di salvegera ji nû ve hatina ser desthilatdariyê ya Talîbanê de (15’ê Tebaxa 2021’an), ji bo piştevaniya bi jinên Efganistanê re daxuyaniyek nivîskî weşand.
Di daxuyaniyê de, hat destnîşankirin ku di bin rêveberiya Talîbanê de jin ji perwerde, kar, jiyana siyasî û jiyana gelemperî hatine dûrxistin, maf û azadiyên wan ên bingehîn bi rengekî giran hatine astengkirin. Hat diyar kirin ku, dûrxistina jinan ji qada gelemperî polîtîkayeke sîstematîk e ku jinan li hemberî tundî û zextê bêparastin dihêle.
TJK-E’yê, vekişîna DYE û hêzên Rojavayî yên ji Efganistanê di sala 2021’an de û ji nû ve hatina desthilatdariyê ya Talîbanê wekî berdana siberoja jinên Efanistanê bo rêveberiyeke zordar nirxand. Ji civaka navneteweyî re bang hat kirin ku li hemberî binpêkirina mafên jinan a ji aliyê Talîbanê ve bêdeng nemînin û rê nedin ku ev pergal bibe tiştekî asayî.
Her wiha di daxuyaniyê de, hat gotin ku jinên Efganistanê tevî hemû zextan jî ji bo mafê perwerde, kar, beşdariya siyasî û jiyana azad berxwedana xwe berdewam dikin. TJK-E’yê, da zanîn ku ew piştevaniya kampanya azadiyê ya di navbera 15’ê Tebaxê û 25’ê Mijdarê de dikin û têkoşîna jinên Efganistanê wekî parçeyekî têkoşîna xwe ya azadiyê dibînin.
TJK-E’yê, diyar kir ku piştevaniya jinan hêzeke hevpar e ku sînoran derbas dike û destnîşan kir ku azadbûna jinê yek ji mercên bingehîn ên azadbûna civakî ye.
