Konferansa Aştî û Civaka Demokratîk a Navneteweyî ya DEM Partiyê bi beşdariyeke xurt li Stenbolê pêk hat. Beşdarên konferansê li ser girîngiya banga Aştî û Civaka Demokratîk a Rêber Apo nêrînên xwe anîn ziman û tecrûbeyên cîhanê nîqaş kirin.
Ji beşdarên konferansê, endamê damerîner ê Partiya DEVA parêzvanê mafên mirovan Ahmet Farûk Unsal nêrînên xwe yên li ser pêvajoyê ji ANF’ê re parve kir.
Unsal diyar kir ku konferans ji destpêka pêvajoyê û vir ve yek ji civînên girîng bû û got, “Çend sedemên vê hene. Ya yekemîn ji çar parçeyên Kurdistanê, Rojhilat ne di nav de tevlîbûn li vê civînê bûn. Nûnerê Birêz Nêçirvan Barzanî, nûnerê YNK’ê peyamên girîng ên piştevaniyê dan. Daxuyaniya teorîk a Birêz Ocalan ku çarçoveya teorîk destnîşan kir û rexne li reel sosyalîzmê kir, gelekî girîng bû.”
‘PÊVAJOYA JI NIHA Û PÊ VE WÊ LI GORÎ GAVÊN MECLÎSÊ DIYAR BIBE’
Unsal destnîşan kir ku aliyekî din ê girîng ê pêvajoyê ew e ku ji bo yekîtiya neteweyî ya Kurd gelekî girîng e, bi taybetî daxuyaniyên YNK, PDK’ê û partiyên weke wan ên li ser pêvajoyê bûne cihê hêviyê û got, “Me ev yek dît; Ji niha û pê ve bêguman karê komîsyona li meclîsê qediya. Ew ê karê xwe bi bernameyekê, bi raporekê bi encam bikin û welê tê fêhmkirin ku pêvajoya li ser rê û rêbazên meseleya qanûnû destûra bingehîn destpê bike ku em jê re qanûnên azadiyê dibêjin, wê şêweyê tevlîbûna endamên rêxistinê li nava jiyana siyasî û civakî diyar bike. Wê pêvajoyê hîn destpê nekiriye, lê belê xuya ye ber bi wê derê ve diçe. Pêvajoya ji niha û pê ve wê li gorî rapora ku komîsyona meclîsê pêşkêş bike, diyar bibe.
‘PÊVAJO JI BO YEKÎTIYA NETEWEYÎ GAVEKE GIRÎNG E’
Ev pêvajo ji bo yekîtiya neteweyî dikare bibe gaveke girîng. Meseleya bêçekkirina Rojava, weke qadeke ku herî zêde di navbera Tevgera Kurd û Komara Tirkiyeyê de tê nîqaşkirin, tê dîtin. Di vê meseleyê de, daxuyaniyên beriya niha yên nûnerên ji Başûrê Kurdistanê hatin, nîşan didin ku QSD li pozîsyona xwe ye. Bi dîtina min ev yek nêzîkatiyeke gelekî girîng e. Heta niha hesasiyetên Tirkiyeyê li ber çavan hatin girtin, lewma êdî rastiya qada Sûriyeyê li ber çavan tê girtin û ji pozîsyoneke ku destketiyên Kurdan ên li wê derê li ber çavan digire, axaftin tê kirin. Bi dîtina min, ev yek ji bo yekîtiya Kurdan gaveke girîng e. Şoreşa Rojava Kurdên li tevahiya cîhanê li dora xwe civand û bû gaveke dîrokî û hesasiyeteke neteweyî bi xwe re afirand.”
