Îro Parêzgarê Hesekê Nûredîn Ehmed bi endamê nûnerê hikumeta demkî yê ji bo şopandina peymana 29ˊê Çileyê û nûnerên Komîteya Koçberên Serêkaniyê re civiya, mekanîzmeyên amadekirina rewşên guncaw ên ji bo vegera koçberan nîqaş kirin.
Di civînê de ji nûnerên hikumeta demkî Mistefa Ebdî, Cîgirê Mûdîrê Ewlekariya Hundirîn a Hesekê Mehmûd Xelîl Elî amade bûn, li daxwazên komîteyê guhdar kirin û hat gotin ku pêwîstî bi pêkanîna jîngeheke ewle ya vegera koçberan û vegerandina mal û milkên wan heye.
Endama Komîteya Koçberên Serêkaniyê Zehra Samo ji ajansa me re der barê mijarê de axivî û diyar kir ku xebatên rakirina mayînan li bajêr hîna didomin.
Zehra da zanîn ku di civînê de rewşa ewlehî li Serêkaniyê û pêwîstiya vegerandina mal û milkên koçberan hat nîqaşkirin.
Di dewama axaftina xwe de Zehra anî ziman ku hîna wextek ji bo vegera Koçberan nehatiye diyarkirin. Tê payîn wê koçber li ser sê beşan bên vegerandin; destpêkê ji gundên Til Temir û Zirganê, dûre bajarê Serêkaniyê. Di heman demê de wê nêzî 300 malbatên ji taxa Xiwêranê ne ku niha li Serêkaniyê ne ji malan bên derxistin û ber bi herêmên wan ve bên şandin.
Zehra destnîşan kir ku di civînê de herî zêde nîqaş li ser pêşkêşkirina piştgiriya xizmetguzarî ji koçberên vegerin re ji hêla aliyên hikumetê û rêxistinên mirovî ve, hatin kirin.
Parêzgarê Hesekê jî bal kişand ser girîngî xurtkirina aştiya navxweyî û pêşxistina ruhê jiyana hevbeş di nava xelkê herêmê de. Parêzgar her cureyên xîtaba kîndariyê red kirin û ji aliyên eleqedar û rêxistinên mirovî re xwest ku hewldanên xwe ji bo dabînkirina jîngeheke xizmetguzarî û ewlehî ji bo vegera koçberan zêde bikin.
