Şewata li aliyê gundê Angul û deşta Fîsê yên li navçeya Licê ya Amedê derket, bi saetan berdewam kir. Şewat piştî mudaxeleya şaredariyên navçeyan û şaredariyên bajarên li derdorê derengiya şevê hate kontrolkirin. Ji ber şewata ku ji ber bayê belav bû û gihîşt gelek gundan, bi sedan ajal telef bûn û darên li ser bi sedan donim erdî jî şewitîn.
Piştî daxuyaniya Walîtiyê ku ku di xaxuyaniya xwe de got: ‘’Balafirên me mudaxeleyî şewata li Semsûrê dikin û tişteke ku bibe sedema talûkeyeke mezin tune ye’’, ji hewayî tu mudaxele li şewatê nehate kirin. Li gel koordînasyona ku ji aliyê şaredariyên Licê û Amedê ve hate avakirin, bi sedan personel û wesayitên agirkujiyê berê xwe dan cihê şewatê û şewat ji aliyê wan ve hate vemirandin. Li navçeyê hê jî xebatên sarkirinê berdewam dikin û gundiyan li hemberî derketina rîska şewatê dest bi girtina nobedê. Li gel van geşedanan şahidên şewatê ji ajansa me re axivîn. Welatiyan da zanîn ku şewat li nêzî du qereqolên ku li hemberî hev, derketiye û diyar kirin ku Qeymeqamtî hatiye ba wan û ji wan re gotiye, ‘’Tiştekî ku em bi şev bikin tune ye, em ê bi roj mudaxele bikin.’’
Li navçeya ku lê gelek erd şewitî, Kizilay û AFAD bi derengî gihîştin qada şewatê û leşkeran jî li şûna şewatê vemirînin bes wêne girtin. Rêveberiyên xwecihî bi kedeke mezin hewl dan şewatê vemirînin û hevşaredar gund bi gund geriyan û rewşa welatiyan pirs kirin.
Yek ji şahidê şewatê Endamê Meclîsa Şaredariya Licê Ferhat Beko diyar kir ku şewat ji ber bayê di demeke kurt de gelekî belav bûye û ev yek anîn ziman: ‘’A niha welatî bi derfetên xwe hewl didin şewatê vemirînin. Bi traktorên xwe zeviyên xwe dikêlin ku şewat negihîje xaniyan. A niha baxçeyên xwe û xweza danîne milekê hewl didin bes ewlehiya jiyana xwe dabîn bikin.’’
BAXÇE Û AJALAN ZIRAR DÎT
Ferhat Beko da zanîn ku ajal di bin talûkeyeke mezin de ne û got: ‘’Piraniya welatiyan malên xwe terikandine û derbasî deverên cuda bûne. Temaiya gundan vala ne. Ez nizanim çend gund û gundik hene lê belê gelek xanî hatine valakirin. Bi taybetî jî li Gundê Çelîk ji bo ajalan talûkeya mezin berdewam dike.’’
GOTIN ‘EM Ê BI ROJ MUDAXELE BIKIN’
Me ji rayedaran pirsî bê ka çima ji hewayî mudaxele nayê kirin? Li hemberî vê pirsa me ev yek anîn ziman: ‘’Ji ber ku şev e nabe ku ji hewayî mudaxele bê kirin. Em dikarin bes bi roj mudaxele bikin ji ber ku helîkopterên me yên şev dibînin, tune ne.’’
Beko di dewama axaftina xwe de anî ziman ku gelek erd şewitiye, gelek baxçe û ajelan zirar dîtiye û diyar kir ku gelê li herêmê bi derfetên xwe şewata li deverên ku tîmên agirkujiyê nikarin derbas bibin, hewl didin şewatê vemirînin.
ŞEWAT LI REX QEREQOLÊ DEST PÊ KIR
Welatiyê bi navê Şervan Sonsûz ê ji gundê Huseynîk jî ev yek anîn ziman: ‘’Şewat di derdora saet 2’yan de dest pê kir. Li rex qereqolê dest pê kir û piştre belav bû. Şewatê heya derengiya şevê berdewam kir. Hersal ev qereqol derdora xwe dişewitîne û şewat derdikeve. Hersal ev der dişewitin. A niha ji ber ku şev e zêde xuya nake lê belê zirareke mezin heye. Baxçe û ajelên gundiyan şewitîn. Erd hemû şewitîn. Deverên li nêzî gundan şewitîn.’’
