Wezîrê Karên Derve yê Brîtanyayê Hamish Falconer, bersiva pirsên li Parlamentoyê yên derbarê serdana Serokkomarê Demkî yê Sûriyeyê Ehmed El Şara ya ji bo Londrayê û peymana di navbera HSD û Şamê de da.
Wezîr Falconer anî ziman ku Brîtanya bi dilxweşî pêşwaziya peymana navbera rêveberiya Şamê û HSD’ê dike, ku entegrasyona Rojava di nav avahiya dewleta Sûriyeyê de dipêşbîne. Lê belê, Londrayê bal kişand ser wê yekê ku divê ev pêvajo ne tenê yekbûneke îdarî be, di heman demê de bibe veguhertineke ku mafên siyasî û civakî jî garantî bike.
Falconer bi bîr xist ku di navbera Hikûmeta Sûriyeyê û Hêzên Sûriyeya Demokratîk de peymanek ji bo entegrasyona gav bi gav a Bakur û Rojhilatê Sûriyeyê di çarçoveya rêveberiyeke yekbûyî de hatiye çêkirin û destnîşan kir ku di vê çarçoveyê de entegrasyona saziyên leşkerî û sivîl jî cih digire.
Falconer diyar kir ku Keyaniya Yekbûyî pêşwaziya vê peymanê û pêşketinên destpêkê dike û wiha got: “Keyaniya Yekbûyî vê peymanê û pêşketinên pêşîn ên hatine bidestxistin bi dilxweşî pêşwazî dike. Di nav van de pejirandina ketina hêzên Wezareta Navxweyî bo herêmên HSD’ê, derxistina biryarên ku mafên gelê Kurd garantî dikin û tayînkirina endamên HSD’ê bo cihên hikûmetê hene. Di dema serdana El-Şara de, me giringiya bicihanîna tam a peymanê û berdewamkirina pêşketinê bi taybetî di van mijaran de ji hikûmetê re ragihand.”
DIVÊ VEGUHERTINEKE SİYASÎ YA BERFIREH HEBE
Falconer anî ziman ku wan ji El-Şara re gotiye divê peyman bi tevahî were bicihanîn û giringiya parastina mafên siyasî û çandî yên gelê Kurd, dûrneketina ji mekanîzmayên rêveberiya herêmî û parastina statuya jinan û saziyên xweser ên li herêmê careke din anîne ziman. Falconer destnîşan kir ku Brîtanya di peywendiyên xwe yên bi rêveberiya Şamê re de tekezî li ser “veguhertineke siyasî ya berfireh” kiriye.
Falconer bal kişand ser şer û pevçûnên ku di destpêka salê de li Rojava qewimîn û angaşt kir ku ew welatê herî bi lez destwerdana mirovî li herêmê kiriye ye. Bi taybetî di dema krîza li Kobanê de, wî diyar kir ku ji bo berdewamkirina xizmetên tenduristiyê piştgiriyeke rasterast hatiye dayîn.
Falconer destnîşan kir ku Brîtanya ji bo rawestandina şer û berdewamkirina diyalogê peywendiyên xwe bi HSD û rêveberiya Şamê re didomîne û bal kişand ser giringiya peymaneke
