Li gorî agahiyên ku New York Timesê dispêre çavkaniyên DYE’ê û Îsraîlê, Elî Xamaney bi saya tedbîrên ewlehiyê yên xurt di nav salan de ji gelek hewldanên kuştinê rizgar bûye.
Hat gotin ku Xamaney ji bo civîneke rûtîn bi şêwirmendên payebilind re ji bunkera xwe ya bin erdê ya li Tehranê derketiye. Agahiyên teqez ên CIA’yê, rê da ku êrîş di wê gavê de were kirin.
Li gorî nûçeyê êrîş hê şeva beriya bûyerê hatibû plankirin. Lê belê, piştî cihê civînê hat tesbîtkirin, dem hate guhertin. Hat diyarkirin ku biryara dawî ji hêla Donald Trump ve piştî têkçûna danûstandinên Cenevreyê hatiye dayîn.
DI BIN SIYA DÎPLOMASIYÊ DE AMADEKARÎ
Hate gotin ku DYE’yê mîna ku danûstandin berdewam dikin nîşan daye, lê di vê navberê de li Washington û Tel Avîvê amadekariyên operasyonê tevî Îsraîlê temam kiriye. Rayedarên îstîxbarata Îsraîlê, îdîa kirin ku aliyê Îranê bawer dikir ku Trump şer nede destpêkirin.
TELEFONÊN AJOKAR, SAZÎ Û KARMENDAN
Hate diyarkirin ku operasyon di encama berhevkirina îstîxbaratê ya bi mehan, hatiye amadekirin. CIA’yê demeke dirêje çavdêriya rûtîn a rojane, torên ragihandinê û prosedurên ewlehiyê yê Xamaney şopandiye. Hate gotin ku CIA’yê ezmûna ku ji şerê 12 rojan a Hezîrana 2025’an bi dest xistiye, di vê pêvajoyê de bikar aniye.
Li gorî agahiyan tîmên îstîxbaratê telefonên ajokar, parêzvan û karmendên rayedarên payebilind hedef girtine. Her wiha ji dîmenên peykê, torên sîxurên herêmî û daneyên ragihandinê sûd hatine girtin.
KOORDÎNASYONA WASHINGTON Û TEL AVÎVÊ
Hat ragihandin ku beriya êrîşê Mossad û rayedarên îstîxbarata leşkerî yên Îsraîlê çûne Washington û li ser du planên operasyonê nîqaş kirine. Hat gotin ku CIA’yê dîmenên peykê û agahiyên têkildarê qadê parve kiriye û li ser vê Îsraîl li dijî cihên hatine tesbîtkirin êrîşên hewayî lidar xistine.
WINDAHIYA RAYEDARÊN PEYABILIND
Hate ragihandin ku ji bilî Xamaney fermandarê Muhafizên Şoreşê yê Nû Muhammed Pakpur û şêwirmendê Xamaney Elî Şemhanî hatine kuştin. Li gorî çapemeniya Îranê, nêzî 40 rayedarên siyasî û leşkerî yên payebilind di êrîşan de hatine kuştin.
Heyva Sor a Îranê jî ragihand ku di encama êrîşan de bêhtirî 200 kes hatine kuştin û 747 kes jî birîndar bûne. Çapemeniya dewletê, da xuyakirin ku qurbaniyên sivîl ku di nav de zarok jî hene, çêbûne.
