Dewleta Tirk û çeteyên wê bi hemû şêwaz û rêbazên qirêj êrîşî bajarê Kobanê dikin. Ji hemû aliyan ve bajarê Kobanê di bin dorpêçê de ye. Berxwedaniya gel bi şev û roj dewam dike. Lê belê ne av, ne ceyran û ne jî pêdiviyên jiyanî tên Kobanê.
Şêniyên Kobanê ji ANF’ê re axivîn û anîn ziman ku ruxmî hemû pêdiviyên jiyanî li ser wan hatine qutkirin jî wê ev tişt li hemberî berxwedana wan nebe asteng û ew ê li ber xwe bidin.
Kalemêrê bi nave Elî Ebdo destnîşan kir ku serkeftin wê ya gel be û ev yek anîn ziman: ‘’Em bi rewşeke awerte re rû bi rû ne, li dora me dorpêçek heye. Lê ruxmî wê jî îsrara me ya berxwedaniyê di asta herî bilind de ye. A niha ceyran û av li bajarê Kobanê qut kirine. Lê çi dibe bila bibe em ê li ber xwe bidin. Em weke gelê Kurd çawa me cara ewil çeteyên DAÎŞ’ê têk birin, em ê vê carê jî li Kobanê de wan têk bibin. Em bang li hemû Kurdên her çar perçeyên Kurdistanê dikin ku êdî rabin ser piyan.”
EM BI ŞEV Û ROJ LI SER PIYAN IN
Dayîka bi navê Cemîle Xalid Xelîl jî anî ziman ku ew ê teqez bi ser bikevin û got: “Em bêyî av, ceyran û înternêt in ku li ser bajêr hatine qutkirin. Me li vî bajarî çeteyên DAÎŞ têk bir. Em ê niha dîsa wan têk bibin. Em ji vî bajarî dernakevin ji ber ku ev axa me ye. Em bi şev û roj li ser piyan in, çeka me li pişta me ye û em parastina axa xwe dikin.”
Ciwanê bi navê Ferhad Mehmûd Şebê jî axivî û diyar kir ku şervan li ber xwe didin û ew li pişta wan in û got: ‘’Em parastina bajar û axa xwe dikin, lê belê hemû pêdiviyên jiyanî li ser bajarê me hatine qutkirin. Me beriya niha çawa çeteyên DAÎŞ’ê têk birin, em ê dîsa wan têk bibin. Niha dîsa berxwedanî heye, em ê jî xwedî li wê berxwedaniyê derkevin.”
