Spor yek ji wan qadên bingehîn e ku tevlîbûna mirovan a li qada civakî û fîzîkî xurt dike. Lê belê astengiya li pêşiya tevlîbûna astengdarên dîtinê li qada sporê dewam dike. Tesîsên sporê yên ji derfetên xwegihandin û bikaranînê bêpar, derfetên kêm ên branş û antremanê, pirsgirêkên ragihandinê û mercên aboriyê li pêşiya astengdarên dîtinê dibin asteng ku karibin bi rêk û pêk û bi serê xwe tevlî karên sporê bibin.
Serokê Federasyona Astengdaran a Amedê û Kulûba Sporê ya Astengdarên Dîtinê ya Amedê Abdulmecît Yilmaz mijar ji ajansa me re nirxand.
‘ASTENGIYA HERÎ MEZIN NEBÛNA QADÊ Û KÊMASIYA BINESAZIYÊ YE’
Yilmaz diyar kir ku astengdar nikarin bi dilxwazî li bajêr sporê bikin û pirsgirêka bingehîn jî nebûna wan qadan e ku karibin antremanê û maçê lê bikin.
Yilmaz işaret bi branşa Goalballê kir ku ji bo astengdarên dîtinê ye û got, “Di serî de astengdarên dîtinê, ji aliyê tevlîbûna li sporê em li gelek zehmetiyan rast tên. Mînak; lîstikeke astengdarên dîtinê heye ku em jê re Goalball dibêjin. Qadek nîne ku em karibin bi vê lîstikê lê bilîzin. Qadeke me nîne ku em karibin antremanên sporê lê bikin. Beriya her tiştî em li vê derê li pirsgirêkê rast tên. Ji ber ku pirsgirêka qadê heye em nikarin antremanên xwe bikin û nikarin bi hêsanî biçin maçên xwe. Dema ku em tevlî tûrnûvayên li bajarên rojava dibin, mixabin hîn beriya em biçin winda dihesibin. Ji ber ku em nikarin antremanê bikin.”
‘DI TEVLÎBÛNA LI JIYANA CIVAKÎ DE EM BI GELEK PIRSGIRÊKAN RE RÛ BI RÛ DIBIN’
Yilmaz destnîşan kir ku li gel nebûna derfetên sporê her wiha di peydakirina trîbunan û tevlîbûna li jiyana civakî de jî bi pirsgirêkên cidî re rû bi rû dimînin û axaftina xwe bi vî rengî dewam kir:
“Dema ku em diçin maçên Amedsporê li hin pirsgirêkên peydakirinê re rû bi rû dimînin. Eleqeya ji bo bajêr û sporê zêde ye, lê belê ji aliyê peydakirina bilêtan ve em li pirsgirêkan rast tên. Sermeseleyê, ji bernameya Passo mînakê bidim. Ji ber ku ev bername li gorî rewşa astengdarên dîtinê nehatiye avakirin yan jî amadekirin… Bernameyên xwendina ekranê ya bi deng li ser telefonê heye, ji bo astengdarê dîtinê. Ji ber ku bernameya hatiye amadekirin li gorî vê nehatiye dîzaynkirin, em nikarin bi rehetî bilêtê bikirin. Dema ku nikaribe E-Biletê bikirin jî nikarin wî mafê xwe bi kar bînin.
Li stadê pirsgirêka înternetê heye. Weke astengdarekî dema diçim maçê hem dixwazin wê atmosferê bijîm hem jî zanibin bê li jê rê çi diqewime. Her kes nikare ji min re qalê bike, lewma jî divê ji radyo yan jî weşanê maçê bişopînim. Dema ku înternet nebe em nikarin wê weşanê bişopînin, tenê bi dengê qelebalixiyê re rû bi rû dimînin. Yanî em nikarin wê atmosferê bi dilê xwe bijîn.”
Yilmaz destnîşan kir ku di mijara bilêtan de divê Fedderasyon, Wezareta Spor û Ciwanan û rêveberiya Amedsporê çareseriyeke hevpar peyda bikin.
‘SPORVANÊN ME BI PIRSGIRÊKÊN CIDÎ YÊN MADÎ RE RÛ BI RÛ DIMÎNIN’
Abdulmecît Yilmaz anî ziman ku potansiyela sporvan û nifûsa astengdaran a li herêmê di ser nîveka Tirkiyeyê re ye û got, “Dema ku em sporvanên xwe dibin tûrnûvayê bi pirsgirêkên mezin ên madî re rû bi rû dimînin. Li herêma me di nava astengdarên dîtinê de gelek sporvanên me yên gelekî serketî hene lê belê bi destê van mirovan nayê girtin. Ji ber ku nikare derfetan peyda bikin, bivê nevê neçar dimînin biçin bajarên rojava û li ber destê me sporvanên xurt namîne.”
