Di 3’yemîn Festîvala Fîlmên Kurdî ya li Dusseldorfê ya îsal de bi giştî 29 fîlm hatin nîşandan. Ji van fîlman, 3 fîlmên dirêj, 9 belgefîlm û 17 kurtefîlm bûn. Di festîvalê de 3 fîlm ji Rojava, 10 ji Bakur, 5 ji Rojhilat û 7 ji Başûr, ligel 4 fîlmên navneteweyî hatin nîşandan.
Fîlmên 9 derhênerên jin jî di bernameya festîvalê de cih girtin. Taybetmendiyek girîng a festîvalê ew bû ku fîlmên ji çar parçeyên Kurdistanê di kategoriyên xwe yên herêmî de pêşbazî kirin.
Festîvalê çar kategoriyên xelatan pêşkêş kir. Xelata Yilmaz Guney, Xelata Sînemaya li Ber Xwe Dide ya Xelîl Dag, Xelata Jîna Emînî û Xelata Mafên Mirovan. Bi giştî 8 xelat di kategoriyên fîlmên kurt û dirêj de hatin dayîn.
Komîteya amadekar, bi taybetî ji bo kurtefîlman diyar kir ku ev rêbaz bi armanca teşwîqkirina sînemevanên ciwan hatiye hilbijartin.
Endamên juriyê jî ji çar parçeyên Kurdistanê û her wiha dîasporayê pêk hat. Shahram Alidî ji Rojhilat, Metîn Ewr ji Bakur, Fermesk Mustafa Abdolrahman ji Başûr û Hêvî Çinar jî ji Ewropayê bûn endamê juriyê.
Ji Komûna Fîlman a Rojava jî Muhyedîn Aslan, jî wekî endamê rûmetê yê juriyê cih girt. Xelatên 3’yemîn Festîvala Fîlmên Kurdî ya li Dusseldorfê hatin ragihandin.
Kurtefîlm ji çar parçeyên Kurdistanê di kategoriyên xwe de xelat wergirtin:
Bakur, fîlma “SÎTAV” a Dîlan Toftik;
Başûr, fîlma “Triangle” a Zhino Hadî Hasan;
Rojhilat, fîlma “Gisoand û Darya” a Zhino Hadi Hasan xelat wergirtin.
Li Rojavayê Kurdistanê jî, xelat pêşkêşî Komuna Fîlman a Rojava hat kirin.
Komîteya amadekar a festîvalê, her wiha xelatek taybet a din pêşkêşî Komuna Fîlman a Rojava kir da ku teşwîq û hevgirtinê nîşan bide.
Xelatên mayî wiha hatin belavkirin:
Xelata Yilmaz Guney ji bo fîlma “All The Mountain Give” hat dayîn;
Xelata Jîna Emînî ji bo fîlma “Hemo”;
Xelata Xelîl Dag a Sînemaya Li Ber Xwe Dide ji bo fîlma “Sibe Dereng e”;
Xelata Mafên Mirovan jî ji bo fîlma “Threads of a Revolution” hatin dayîn.
Festîval bi nîşandana fîlmê “Heval Brako” ê Komuna Fîlman a Rojava dest pê kir. Ji bo bal kişandina ser pêşketinên li Rojhilat jî fîlmê Shahram Alîdî hate nîşandan.
